Bas prokýratýra monıtorıń nátıjesinde saılaý týraly zańnamany buzýdyń 9 faktisin tirkedi.
Basqa saılaýshy úshin daýys berý jolymen teń saılaý quqyǵy týraly talapty buzǵany úshin kináliler Ákimshilik quqyqbuzýshylyq týraly kodekstiń 108-baby boıynsha ákimshilik jazaǵa tartylady, dep habarlaıdy Almaty-akshamy.kz
Bas prokýratýra qoǵamdyq múddelerdi qorǵaý qyzmeti bastyǵynyń orynbasary Azamat Sarǵazınniń aıtýynsha, zańbuzýshylyqtar úsh óńirde – Almaty oblysynyń Eńbekshiqazaq, Jambyl, Raıymbek jáne Uıǵyr aýdandaryndaǵy saılaý ýchaskelerinde, Jetisý oblysynyń Qaratal jáne Kerbulaq aýdandaryndaǵy ýchaskelerinde, Soltústik Qazaqstan oblysynyń Aıyrtaý jáne Jambyl aýdandaryndaǵy ýchaskelerde tirkelgen.
"Bul zańbuzýshylyqtar komısıa músheleri tarapynan azamattarǵa basqa adamdar úshin daýys berýge múmkindik berýmen baılanysty. Iaǵnı saılaý ýchaskelerinde komısıa músheleri saılaýshylardyń ótinishimen olarǵa týysqandary úshin daýys berý úshin búleten bergen. Sol arqyly teń saılaý quqyǵy týraly talapty buzǵan", - dedi Sarǵazın respýblıkalyq telearnada ótip jatqan "Saılaý– 2023" onlaın marafonynda.
Ol búleten bergen barlyq komısıa múshesi saılaý ýchaskelerindegi jumystan shettetilgenin málimdedi. Qazir jergilikti prokýrorlar olardy Ákimshilik quqyqbuzýshylyq týraly kodekstiń 110-baby boıynsha ákimshilik jaýapqa tartý úshin sharalar qabyldap jatyr.
Basqa saılaýshy úshin daýys berý jolymen teń saılaý quqyǵy týraly talapty buzǵany úshin kináliler Ákimshilik quqyqbuzýshylyq týraly kodekstiń 108-baby boıynsha ákimshilik jazaǵa tartylady.
"Biraq bul birli-jarym jaǵdaı", - dedi bas prokýratýra ókili.
Osy oraıda ol saılaý týraly zańǵa sáıkes, árbir saılaýshy ózi daýys beretinin atap ótti. Daýys berý quqyǵyn basqa bireýge berýge jáne sol sıaqty basqa adam úshin daýys berýge tyıym salynady.
Daýys berý bastalǵaly beri yqtımal zańbuzýshylyqtar týraly 32 ótinish túsken. Sonyń ishinde jeteýi bas prokýratýraǵa baǵyttaldy.