Óńirdiń áleýmettik áljýaz sanattaǵy turǵyndaryn jumyspen qamtýdy maqsat etip otyr
Kerbulaq aýdanynda kásipker tigin sehyn ashty. Munda ol aıyna 20 mln teńgeniń ónimin óndirýdi josparlap otyr. Kásiporynda 20 jumys orny qurylyp, oǵan 5 mln teńge ınvestısıa salynǵan, dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Seh zamanaýı tigin qural-jabdyqtarymen qamtylǵan, munda medısınada qoldanylatyn bir rettik buıymdar, sol sıaqty sapaly materıaldan arnaıy kıimder tigiledi.
Tigin fabrıkasynyń dırektory Jarylqasyn Bolatulynyń aıtýynsha, ol mundaı fılıaldardy oblystyń ár aýdan, qalalarynda ashýdy josparlap otyr.
- Bul bizdiń alǵashqy fılıalymyz. Qazir bizdiń eksportqa, sonyń ishinde Reseıge jiberýge daıyndaıtyn tapsyrystarymyz kóp. Ony oryndaýǵa bir ǵana Taldyqorǵandaǵy tigin fabrıkasynyń kúshi jetpeıdi. Sondyqtan oblystyń ár aýdanynda fılıaldar ashyp, sol óńirdiń áleýmettik áljýaz sanattaǵy turǵyndaryn jumyspen qamtýdy maqsat etip otyrmyz, – deıdi J. Bolatuly.
Saryózektegi tigin fabrıkasynyń aıyna bir rettik kıimniń (medısınalyq betperde, halat, kombınezondar) 50 myń danasyn, 1 myń arnaıy kıim jıyntyǵyn tigýge múmkindigi bar.