Almatydaǵy saýdagerler metropolıtendi qala shekarasynan uzartýdy suraıdy
AMANAT belsendileri partıanyń saılaýaldy baǵdarlamasy úshin megapolıs turǵyndarynan usynys-tilekterdi jınaý jumystaryn jalǵastyrýda, dep habarlaıdy Almaty-akshamy.kz.
Sonymen, jýrnalıs, partıa múshesi Maqsat Tolyqbaı men Almaty "amanattyqtary" qalanyń tómengi bóliginde ornalasqan «Túrksib jármeńkesi» bazaryna baryp, shaǵyn bıznes ókilderiniń usynystaryn tyńdady. Belgili bolǵandaı, bul jerde naryqtaǵy ónimderdiń quny aıtarlyqtaı tómen.
«Bizde baǵalar qoljetimdi. Biz taýardyń ústine eń kóbi 100 teńge qosamyz. Bul qymbatshylyqqa sanalmaıdy, bizdiń de nan tabýymyz qajet qoı. Barlyǵymyz "Altyn Ordadan" azyq-túlik satyp alamyz, mine, sol jerde baǵany kóterý boıynsha tekseris júrgizý kerek edi. Benzınniń baǵasy joǵary jáne keptelis, munyń bári baǵanyń ósýine ákeledi. Sonymen qatar, qazir páterlerdiń quny biz úshin qymbat, eger bastapqy jarnaǵa qandaı da bir jeńildikter bolǵanda, kóbisi úıli bolar edi», - deıdi «Túrksib jármeńkesi» bazarynyń saýdagerleri.
Qala turǵyndary megapolıstiń ınfraqurylymyn damytýdyń, atap aıtqanda, metro jelisin qala shekarasynan tys, oblystyń jaqyn ornalasqan qalalaryna deıin uzartýdyń, aýany jaqsartýdyń jáne joldardy jóndeýdiń problemalyq máselelerin kóterdi.
«Kóptegen satýshylar oblysta turady, kún saıyn keptelispen jolǵa 2-3 saǵat ketedi. Eger metro bizge, oblysqa deıin uzartylsa, qalaǵa qatynaý áldeqaıda jyldam ári ońaı bolar edi», - deıdi Almatynyń eń iri sanalatyn «Kók bazar» satýshylary.
Almatylyqtar úshin jataqhana máselesi de árqashan ózekti. Osylaısha, partıalyqtar qaladaǵy jataqhanalardyń birine baryp, stýdentterdiń máselelerin bilip qaıtty.
«Jataqhanamyz 1937 jyly salynǵan. Ǵımarattyń tozyǵy jetken, kúrdeli jóndeý qajet. Sonymen qatar, stýdentterge arnalǵan oryndar óte az, oqý jyly bastalmaı turyp osy máseleni sheshýdi suraımyz. Keńse taýarlary da qazir qymbat, bizdiń bir stıpendıamyzǵa osyndaı úlken qalada turý qıyn, taǵy aqyly túrde oqyp jatqandardy da eskergen jón. Eger stýdenttik bıletti nemese «Ońaı» kartochkasyn usynǵan kezde keńse taýarlaryna jeńildik bolsa, jaqsy bolar edi»,-dep usyndy stýdentter.
Búgingi kezdesýdiń qorytyndysy boıynsha barlyq tilekter men usynystardy aldaǵy ýaqytta partıalyqtar ózderine túrtip aldy.