Abaı alańynda eki kúndik merekelik konsert ótip jatyr. Jańa jyl merekesi qarsańynda Almaty turǵyndary men qala qonaqtaryna arnap «Almaty áýenderi» mekemesiniń shyǵarmashylyq ujymy «Kel, Jańa jyl!» atty keń aýqymdy konserttik baǵdarlamasyn usyndy. Merekelik is-shara búgin saǵat 19:00-de bastaldy.
Erteń dál osy ýaqytta almatylyqtar taǵy da merekelik kóńil-kúıdi sezinip, arnaıy baǵdarlamany tamashalaı alady. Konserttik baǵdarlamada elimizge tanymal kórermen yqylasyna bólenip júrgen ánshiler óner kórsetti.
Atap aıtqanda Baqtıar Taılaqbaev, Óktem Altaev, Tahmına Áshimbekova, Jubanysh Jeksenuly, Marta Tólepbergen, Asqat Tarǵyn, Beıbitgúl Nurymhojına, Dımash Dáýletov, Abık Jeksen, Ǵarıfa Igisinova, Erik Tólenov jáne DARO syndy belgili ónerpazdar án shyrqady. Ónerpazdar tańdaýly týyndylaryn, sondaı-aq jańa jyldyq kóńil-kúı syılaıtyn áýenderdi usyndy. 
Alańǵa jınalǵan qala turǵyndary men qonaqtary merekege oraı bezendirilgen sahna, sapaly dybys pen jaryq, kásibı oryndaýshylardyń óneri kórermenderge umytylmas áser syılady.
- Men Abaı alańyna jaqyn turamyn. Bizde alań qalaı bezendirilgeni unady. Ári konsertten keremet áser aldyq. Naǵyz merekeni sezinip jatyrmyz. Bárine Jańa jyl qutty bolsyn, - dedi Aıym Ahmetova.