Bul jaıt turǵyndardy alańdatyp otyr.
Aqtaý qalasynda Kaspıı teńizine belgisiz suıyqtyqtyń quıylyp jatqan beınejazba turǵyndardy shoshytty, dep habarlaıdy Almaty-akshamy.kz.
Beınejazba keshe túsirilgen. Sýdyń túsi ózgerip, Kaspıı teńizine qatty aǵyspen quıylyp jatqanyn kórýge bolady. Lastanǵan sýdy kórgen turǵyndar Kaspııdiń ýlanǵanyn aıtyp, dabyl qaǵýda.
«Árıne, ý ǵoı! Balshyq aralasqan nemese laı sý osynshama qońyr túske boıalmaıdy. Bul jaqyn jerdegi kásiporynnyń sýy sıaqty. Tekserip, buny toqtatý kerek», – deıdi Aqtaý qalasynyń turǵyny Aıdana Ábil.
Mańǵystaý oblystyq Ekologıa departamentiniń mamandarynyń aıtýynsha, sýdan synama alynyp, tekserý júrgizdi.
«11 qazan kúni keshki ýaqytta áleýmettik jelide Prımorskıı eldi mekeninde ornalasqan "MAEK-Qazatomónerkásip" JSHS-ne qarasty №1 TES aǵyndy kanalyndaǵy sýdyń lastanýy týraly beınejazba taraldy. Sonymen qatar, atalǵan kanalǵa "Kaspıı sý tushshytý zaýyty" JSHS jáne "Orbıta" sport kesheni tógindi jumystaryn júrgizedi. Mańǵystaý oblysy boıynsha ekologıa departamentiniń mamandary jedel túrde oqıǵa oryn alǵan jerge baryp, arna boıyndaǵy lastaný aımaǵyna, sholý jumystaryn júrgizdi», - dep habarlady ekologtar.
Alynǵan synamalardyń nátıjeleri boıynsha, «Opresnıtelnyı zavod Kaspıı» JSHS-niń aǵyzý qubyrynyń kózinen jáne № 1 TES Kaspıı teńizine shyǵaratyn qubyrynyń kózinen alynǵan synama quramynda temirdiń jáne fosfattyń, mystyń artyq mólsheri anyqtaldy.
Endi kúdikti kompanıaǵa qatysty is-qujattar jınaqtalyp, sotqa jiberiledi.