«QazjolǴZI» AQ Oqý ortalyǵy jolshylardyń biryńǵaı biliktilik bazasyn toltyrý úshin derek jınaý jumystary bastalǵanyn jarıalady, dep habarlaıdy Almaty-akshamy.kz QazAqparatqa silteme jasap.
Jolshylardyń biryńǵaı biliktilik bazasy – salalyq eńbek bırjasy nemese mamandardyń sıfrlyq qory. Biliktilik bazasy arqyly merdiger uıymdar onlaın rejımde joldardy jobalaý, olardyń qurylysy jáne qaıta qurý úshin qajet mamandardy taba alady. Jol qurylysshylary ózderiniń kásibı quzyretterin damytýǵa yntaly bolady. Óıtkeni, atalǵan bazada olardyń daǵdylary men oqytý kýrstarynan ótkendigin rastaıtyn sertıfıkattar qoljetimdi bolmaq.
«Biliktilik bazasynda avtojol mamandarynyń sanaty, ótili, daǵdylary men sertıfıkattary týraly málimetter saqtalady. Bizdiń boljamymyz boıynsha, bul bazanyń kómegimen bilikti kadrlardyń jetispeýshiligi sıaqty problemany sheshe alamyz», – deıdi «QazjolǴZI» AQ Oqý ortalyǵynyń dırektory Gúljamal Omarova.
Instıtýt saıtynda jol qurylysy mamandyǵyn ıgergen JOO túlekteri syndy bolashaq mamandar men qazirgi ınjenerler, sheberler, jobalaýshylar týraly ári basqa da málimetter jınala bastady.
«Instıtýttyń saıtynda derekterdi jınaý týraly habarlandyrýmen birge, biz jol salasynda oqıtyn stýdentter, eńbek etetin qyzmetkerler men kompanıalar saýalnamaǵa qatysyp, derekterdi toltyrýǵa múmkindik alatyn silteme jarıaladyq. Jalpy, sıfrlyq baza eńbek naryǵyn taldaýǵa múmkindik beredi», – dedi «QazjolǴZI» AQ Sıfrlandyrý basqarmasynyń basshysy Qurmanǵazy Tileý.
Esterińizge sala keteıik, 2022 jyldyń jeltoqsanynda «QazjolǴZI» atalǵan júıeniń jobasyn jasap, avtorlyq quqyq alǵan bolatyn.