«Alataý Aqparat» JSHS uıymdastyrǵan «Almaty aqshamy» men «Vechernıı Almaty» gazetteriniń turaqty oqyrmandaryna arnalǵan baıqaýdyń jeńimpazdary belgili boldy.
Jalpy, gazet oqyrmandary arasynda utys oıynyn ótkizý qos basylymnyń dástúrine aınalǵan. Sondyqtan «Alataý Aqparat» JSHS ujymy ótken jyly da gazetke jazylýshylar arasynda dástúrli «Jazyl da, utyp al!» atty baıqaýyn jarıalaǵan edi. Qala turǵyndary utysqa qatysyp, baqtaryn synady.
Bul jolǵy saıysqa qatysýshylardyń sany kóp boldy. Arnaıy komısıa músheleri quryldy. Gazetke jazylǵanyn rastaıtyn túbirtekterdi jibergen oqyrmandardyń arasynan kezdeısoq tańdaý arqyly jeńimpazdar anyqtaldy.
«Baıqaýda jańadan jazylǵan oqyrmandar da, burynnan beri bizben birge kele jatqan oqyrmandar da birdeı dárejede qatysty. Gazet súıer qaýymǵa materıaldarymyz qyzyqty, ózekti jáne ótkir bolǵanyna qýanyshtymyn. Shyn máninde, bul solaı. Óıtkeni, biz oqyrmandarymyzdy elimizdiń eń iri megapolısi – Almaty qalasynyń tynys-tirshiligi týraly shynaıy, tekserilgen jáne paıdaly aqparatpen qamtamasyz etemiz. Baıqaýdyń barlyq qatysýshylaryna ózderiniń súıikti gazetterine qatysqany úshin alǵys aıtqym keledi. Jyl saıyn jazylýshylarǵa arnap baıqaýdy ary qaraı da ótkizetin bolamyz. Júldelerdiń qundylyǵy tek arta túsedi dep oılaımyn. «Vechernıı Almaty» jáne «Almaty aqshamy» gazetteriniń baspa nusqalary búginde asa suranysqa ıe jáne ózekti», – dep atap ótti «Alataý Aqparat» JSHS komersıalyq dırektory Qýanysh Dúskalıev.
Saltanatty is-sharaǵa «Alataý aqparat» JSHS komersıalyq dırektory Qýanysh Dúskalıev, «Almatý aqshamy» gazeti Bas redaktorynyń orynbasary Ánýarbek Áýelbek, «Vechernıı Almaty» gazeti Bas redaktorynyń orynbasary Gúljazıra Saıdahmetova qatysyp, jeńimpazdardy baǵaly syılyqtarymen quttyqtady.
«Qaı gazettiń bolsyn, tiregi de, jany da oqyrmandar. Osy kúnge deıin gazetpen aradaǵy baılanysty joǵaltpaı, ár sandy erekshe ynta-yqylaspen kútetin oqyrmandarymyzdyń baryna qýanamyz. Áleýmettik jeliniń yqpaly jyl saıyn artyp keledi. Basylym betterin paraqtaıtyn oqyrmandardyń da qarasy azaıyp bara jatqany jasyryn emes. Ne desek te, osy ýaqytqa deıingi aralyqta bizdi tańdap, bizben birge bolǵandaryńyzǵa qýanyshtymyz», – dedi «Almatý aqshamy» gazeti Bas redaktorynyń orynbasary Ánýarbek Áýelbek.
Utys jeńimpazdary da osyndaı úrdisti úzbeı ótkizip kele jatqan «Alataý Aqparat» JSHS ujymyna rızashylyqtaryn bildirdi.
«Búgin úlken qýanyshty kún bolyp jatyr. Men «Almatý aqshamy» gazetiniń turaqty oqyrmanymyn. 10 jyldaı ýaqyt bolypty meniń jazylǵanyma. Basylym betterinen jańalyqtardan habardar bolyp, mádenı, ádebı, tanymdyq maqalalardy úzbeı oqımyz. Osymen ekinshi ret gazet redaksıasynan syılyq alyp jatyrmyn. Jýrnalıserdiń jumysyna tabys tileımin, jazarlary taýsylmasyn», – deıdi Tilepbergen Gýmarov esimdi oqyrman.
Bıyl gazetke jazylýshylardyń qatary kóbeıip, sanynyń arta túskeni baıqalady.
«Men jalpy qazaq basylymdarynyń janashyrymyn. Uzaq jyldan beri bilim salasynda qyzmet etken janmyn. Sondyqtan gazetti kóp oqımyn. Balalarmen kóp jyl jumys jasaǵandyqtan, balalar jýrnaldaryn, onyń qatarynda «Jyl on eki aı», «Baldyrǵan», «Aq bosaǵa» gazet-jýrnaldaryn kóp balaly otbasylarǵa bıznesmen, qoly ashyq jandarǵa aıtyp jazdyryp kelemin. Bilimdi urpaq ult bolashaǵy demekshi, olardyń basylym betterinen nár alyp, tálim-tárbıe alýlary elimiz úshin mańyzdy. Qazirgi kezde qurmetti eńbek demalysyna zeınetke shyqsam da, súıikti basylymymnan qol úzgen emespin», – deıdi oqyrman Raısa Úmbetbaeva.
«Almaty aqshamy» gazetiniń oqyrmandarynyń arasynda 1-oryn alǵan Túrkistan oblysynyń turǵyny Torabekov Qaldybek esimdi oqyrman «SUPRA» mýltıvarkasyna ıe boldy. Júldeli 2-oryn alǵan Almaty qalasy, Túrksib aýdanynyń turǵyny Gýmarov Tilepbergen «AVM-20W» qysqa tolqyndy peshti qanjyǵasyna baılady. Úzdik úshtikke engen Almaty qalasy, «Nurkent» shaǵynaýdanynyń turǵyny Raısa Úmbetbaeva «AVM-20W» qysqa tolqyndy peshin utyp aldy.