Qazaqstandyqtardyń jalpy boryshtyq júktemesi 19,3 trln teńgege jetti
Qazaqstan Respýblıkasynyń Qarjy naryǵyn retteý jáne damytý agenttiginiń dereginshe, ekonomıkaǵa nesıeler 2022 jylǵy qyrkúıekte 2,0%-ǵa ósip, 21,1 trln teńgeni qurady (jyldyń basynan beri ósim – 14,1%-ǵa nemese 2,6 trln teńge), dep habarlaıdy Almaty-akshamy.kz inbusiness.kz-ke silteme jasap.
"Ulttyq valútadaǵy kredıtter 2022 jylǵy qyrkúıekte 1,8%-ǵa, 19,3 trln teńgege deıin ulǵaıdy, shetel valútasyndaǵy kredıtter 4,4%- ǵa, 1,8 trln teńgege deıin ósti.
Zańdy tulǵalarǵa kredıtter 2022 jylǵy qyrkúıekte 1,3%-ǵa ulǵaıyp, 8,0 trln teńgeni qurady. Bul rette jyl basynan beri osy kórsetkishtiń ósýi 3,6%-dy qurady (2021 jylǵy osyndaı kezeńde – 3,9%-ǵa ósti). Bıylǵy qyrkúıekte zańdy tulǵalarǵa 988 mlrd teńge somaǵa qaryz berildi, bul 2022 jylǵy tamyzben salystyrǵanda 1,5%-ǵa kóp", – dep habarlady agenttik.
İri bızneske qaryzdar 2022 jyldyń basynan beri 2,7%-ǵa 3,3 trln teńgege deıin, SHOB (DK qosa alǵanda) qaryzdary 6,8%-ǵa 5,6 trln teńgege deıin ulǵaıdy.
Salalar boıynsha zańdy tulǵalarǵa berilgen kredıtterdiń negizgi úlesi ónerkásipke (34,1%), saýdaǵa (21,4%), qurylysqa (7,6%) jáne kólikke (5,4%) tıesili.
Jeke tulǵalardyń kredıtteri 2022 jylǵy qyrkúıekte 2,5%-ǵa ulǵaıyp, 13,1 trln teńgeni qurady (aǵymdaǵy jyldyń basynan beri 21,6%-ǵa ósti).
"Jeke tulǵalarǵa kredıtterdiń ósýine jeńildetilgen memlekettik ıpotekalyq baǵdarlamalardy iske asyrýdy jalǵastyrý nátıjesinde ıpotekalyq kredıtteýdiń 3,3%-ǵa 4,3 trln teńgege deıin ulǵaıýy, sondaı-aq tutynýshylyq qaryzdardyń 2,3%-ǵa 7,2 trln teńgege deıin ósýi sebep boldy", – dep habarlady agenttik.