Qazaq ulttyq agrarlyq ýnıversıtetinde dástúrli Halyqaralyq jazǵy mekteptiń ashylý saltanaty ótti. Onlaın, oflaın formattaǵy is-sharada Amerıka, Eýropa, Tynyq muhıt, Ortalyq Azıa memleketteri men TMD-dan kelgen 33 eldiń ókilderi qatysty.
«Bıylǵy Halyqaralyq jazǵy mektep oflaın rejımde ótýde. Onda qatysýshylar bilim kókjıegin keńeıtip, agroónerkásiptik keshendi damytý salasyndaǵy ınovasıalyq tehnologıalarmen tanysa alady», – dep atap ótti QazUAZÝ Basqarma tóraǵasy-rektory, Ulttyq akademıanyń vıse-prezıdenti, akademık Tilektes Espolov.
Halyqaralyq Jazǵy mektep birneshe ǵylymı baǵytty qamtyp, «Tabıǵı resýrstardy baǵalaý jáne basqarý máseleleri», «Jasyl ekonomıka», «Aýyl sharýashylyǵyndaǵy ınovasıalyq tehnologıalar men tehnıkalyq quraldar», «Jer jáne orman resýrstaryn basqarý» sekildi taqyryptarda oı qozǵaıdy. Barlyq tyńdaýshy arnaıy pánder boıynsha 5 ECTS alatyn bolady. Jazǵy mektep aıasynda jas ǵalymdar STARTUP jobalardyń onlaın-baıqaýyna qatysa alady. Úzdik jobalar marapattalyp, arnaıy sertıfıkattar beriledi.
«Osy eki apta biz úshin óte mazmundy jáne qyzyqty bolatynyna senimdimin. Halyqaralyq jazǵy mekteptiń qatysýshylary ınovasıalyq ortalyqtarda, ýnıversıtettiń jáne ǵylymı uıymdardyń zertteý zerthanalarynda, ozyq sharýashylyqtar men kásiporyndarda bilim alyp qana qoımaı, qalamen tanysyp, teatrlarǵa, murajaılarǵa, kórmelerge jáne basqa da kórikti jerlerge bara alady», – deıdi T.Espolov.
Jazǵy mektep aıasynda azyq-túlik qaýipsizdigi jónindegi Islam uıymynyń halyqaralyq forýmy ótti. Otyrys 75 jyldyq mereıtoıyn jaqynda ǵana atap ótken QR Ulttyq Ǵylym akademıasynyń «Ǵylym ordasynda» uıymdastyryldy. İs-sharanyń moderatory Azyq-túlik qaýipsizdigi jónindegi Islam uıymynyń baılanys aǵa ofıseri Manafı Abdýlla Mýtýalo boldy.
15 maýsym kúni «Zertteý ýnıversıtetiniń Qazaqstandyq modeli – damýdyń 20 jyldyq tájirıbesi» forýmy jáne TMD-nyń jetekshi agrarlyq JOO rektorlary keńesiniń keńeıtilgen otyrysy ótedi. Ulybrıtanıada jaryq kórgen «Zertteý ýnıversıtetiniń Qazaqstandyq modeli», «QazUAZÝ – durys tamaqtaný jáne qorshaǵan orta salasyndaǵy álemdik deńgeıdegi jetekshi ýnıversıtet» atty jańa kitaptardyń tanystyrylymy úsh tilde ótedi.
Osy forým aıasynda ótetin taǵy bir aýqymdy is-shara – 2023 jylǵy QS bas reıtıńisinde joǵary oryndarǵa ıe bolǵan 14 qazaqstandyq JOO-ǵa estelik belgilerin tabystaý rásimi. Syılyqty QS Ortalyq Azıa jáne Shyǵys Eýropa boıynsha aımaqtyq dırektory Hrıstolúbov Sergeı Vladımırovıch ózi tabystamaq.