Jazda 11 myńnan asa mektep janyndaǵy ári qala syrtyndaǵy saýyqtyrý lageri jumys isteıdi
BǴM Balalar quqyqtaryn qorǵaý komıteti tóraǵasynyń orynbasary Elına Paýlı balalarǵa jazǵy lagerge tegin joldamany qalaı alýǵa bolatynyn túsindirdi, dep habarlaıdy Almaty-akshamy.kz inbusiness.kz-ke silteme jasap.
Onyń aıtýynsha, jazǵy saýyqtyrý lagerine tegin joldama aldymen jetim, az qamtylǵan, kópbalaly, tolyq emes otbasylardan shyqqan balalar, múgedek balalar alady.
"Balalardyń jazǵy demalysyna tegin joldama alý úshin bilim berý uıymy basshysynyń atyna ótinim jazý kerek. Tegin joldamany alatyndardyń tiziminde memlekettik ataýly áleýmettik kómek alýǵa quqyǵy bar otbasylardan shyqqan balalar, jan basyna shaqqandaǵy tabysy eń tómengi kúnkóris deńgeıiniń shamasynan tómen otbasylardan shyqqan balalar, jetim balalar, ata-anasynyń qamqorlyǵynsyz qalǵan balalar, tótenshe jaǵdaılar saldarynan shuǵyl járdemdi talap etetin otbasylardan shyqqan balalar, mekteptiń qamqorshylyq keńesi anyqtaıtyn ózge de sanattaǵy bilim alýshylar, tárbıelenýshiler bar", - dedi Elına Paýlı.
Komıtet tóraǵasy orynbasary balalardyń jazǵy demalysyn uıymdastyrý ári joldama berý jergilikti atqarýshy organdar quzyretinde jáne olardyń qarajatyna baılanysty úlestiriletinin túsindirdi.
"Jazda 11 myńnan asa mektep janyndaǵy ári qala syrtyndaǵy saýyqtyrý lageri jumys isteıdi. Bıyl ótken jylmen salystyrǵanda 500 myńǵa artyq bala lagerde demalady, al jazǵy saýyqtyrý demalysymen qamtylatyn balalardyń jalpy sany 2 mln 300 myńnan asady", - dedi basshy.