Almatyda arhıvtaný jáne is júrgizý boıynsha VII respýblıkalyq stýdenttik olımpıada ótti.
Qazaqstan Respýblıkasy Prezıdentiniń Arhıvi ál-Farabı atyndaǵy Qazaq ulttyq ýnıversıtetimen birlese arhıvtaný jáne is júrgizý boıynsha VII respýblıkalyq stýdenttik olımpıadasyn ótkizdi. İs-shara QR «Ulttyq arhıv qory jáne arhıvter týraly» zańynyń 25 jyldyǵyna oraı «Tarıhı qujat – urpaqqa amanat» arhıvtik marafonynyń aıasynda uıymdastyryldy.
Qazaqstan Respýblıkasy Prezıdentiniń Arhıvi atalmysh olımpıadany bıyl jetinshi jyl ótkizdi. Olımpıadanyń maqsaty – stýdentterdiń ǵylymǵa yntasyn arttyrý, Ulttyq arhıv qorynyń qujattaryn áıgileý, arhıv isi men qujattanýdy nasıhattaý, arhıv mamandyǵynyń mártebesin kóterý, jalpy arhıv isi jáne qujattanýdy damytý.
«Atalǵan Olımpıadany QR Prezıdentiniń Arhıvi ál-Farabı atyndaǵy Qazaq ulttyq ýnıversıtetimen birge 2016 jyldan bastap ótkizip keledi. Dástúrli túrde bul sharaǵa respýblıkanyń joǵarǵy oqý oryndary men kolej stýdentteri qatysady.
Búgingi tańda qoǵamnyń turaqty damýy jaǵdaıyndaǵy memlekettik qyzmetterge sıfrlyq tehnologıalardyń engizilýi, aqparattyq-kommýnıkasıalyq tehnologıalardyń róliniń artýy arhıvterdiń aldyna jańa mindetterdi belgileıdi. Memleket tarapynan elimizdegi arhıv salasyn damytý boıynsha belgilengen mindetterdi júzege asyrý úshin birinshi kezekte joǵary bilikti mamandar qajet», – dep is-sharanyń alǵysózinde QR Prezıdent Arhıviniń dırektory Álıa Mustafına atap ótti.
Olımpıada eki kezeń boıynsha ótkizildi: birinshi – «Kreatıvti arhıvshi» taqyrybynda shyǵarmashylyq tapsyrmany oryndaý; ekinshi – komandalyq ǵylymı jobalardy qorǵaý.
Komandalyq ǵylymı jobalar «Arhıvtegi sıfrlyq tehnologıalar» jáne «Basqarýdy qujattamalyq qamtamasyz etý salasyndaǵy ınovasıalar» taqyryptarynda boldy.
Aıta ketken jón, QR Prezıdent Arhıvi arhıvtaný jáne qujattaný pánderin oqıtyn stýdentterdi kásibı baǵdarlaý maqsatynda birqatar is-sharalar ótkizilip keledi. Arhıvte stýdentter úshin praktıkalyq sabaqtar bolady. Jas mamandar arhıv uıymdastyratyn is-sharalarǵa, tarıhı kórmelerge, dóńgelek ústelderge, belgili ǵalymdar men tarıhshylarmen kezdesýlerge qatysady. Sonymen qatar elimizdegi birqatar joǵary oqý oryndary men orta arnaýly mekemelerdiń stýdentteri men magıstranttary jyl saıyn Arhıvte óndiristik jáne ǵylymı-zertteý tájirıbesinen ótedi.
