Óńirlerde otyn tapshylyǵy men irkilister bolmaýy tıis.
Premer-Mınıstr Álıhan Smaıylovtyń tóraǵalyǵymen ótken kezekti Úkimet otyrysynda kún tártibinen tys ishki naryqty janar-jaǵarmaımen qamtamasyz etý máselesi qaraldy, dep habarlaıdy Almaty-akshamy.kz Egemen.kz silteme jasap.
Úkimet janarmaı naryǵyndaǵy jaǵdaıdy turaqtandyrý úshin qajetti shuǵyl sharalardy qabyldady.
Óńirlerdi munaı ónimderimen qamtamasyz etý boıynsha kúndelikti jumys júrgizetin jedel komısıa quryldy. Ár oblysta munaı bazalary men usaq janar-jaǵarmaı quıý beketterin baqylaý jónindegi óńirlik komısıalar quryldy. Zaýyttarda munaı óńdeý jáne dızel otynyn óndirý kólemi ulǵaıtyldy. Munaı ónimderin áketýge jol bermeý maqsatynda qajetti eksporttyq shekteýler engizildi, dızel otyny ishki naryqqa deldaldarsyz jetkiziledi.
«Qabyldanyp jatqan sharalardyń nátıjesinde janar-jaǵarmaı naryǵyndaǵy ahýal bir qalypqa kelip jatyr. Degenmen jaǵdaıdy únemi nazarda ustap, qatań baqylaý qajet. Mysaly, keıbir óńirlerde suıytylǵan gazdyń tapshylyǵy oryn alyp otyr. Sondyqtan keshendi jumysty odan ári jalǵastyrý kerek, óńirlerde otyn tapshylyǵy men irkilister bolmaýy tıis», - dedi Álıhan Smaıylov.
Úkimet basshysy mınıstrlikterge birqatar tapsyrma berdi. Tapsyrma boıynsha Energetıka mınıstrligi men Sıfrlyq damý mınıstrligi 15 qyrkúıekten bastap janarmaı quıý stansıalarynda janar-jaǵarmaı bosatýdy esepke alýdyń sıfrlyq júıesin engizýi kerek.
Aýyl sharýashylyǵy mınıstrligi bıylǵy jyldyń sońyna deıin aýyl sharýashylyǵy óndirýshileri úshin jeńildikti dızel otynyn bólý júıesin engizýdi qamtamasyz etýi tıis.
2023 jyldan bastap Energetıka mınıstrligi munaıdy óńdeýdiń jańa júıesine kóshýdi iske asyrýy kerek. Bul júıe munaı ónimderin satý kezinde qajetsiz deldaldardyń qatysýyna jol bermeıdi.