Bul – búkil qoǵamdy ózgertetin kúrdeli ári uzaq úderis.
Memleket basshysy Qasym-Jomart Toqaev Ulytaýdaǵy Ulttyq quryltaıdyń İ otyrysynda osylaı dedi, dep habarlaıdy Almaty-akshamy.kz
«Jańa Qazaqstan bir kúnde nemese bir jylda qurylmaıtyny anyq. Bul – búkil qoǵamdy ózgertetin kúrdeli ári uzaq úderis. Muny júzege asyrý úshin bir ǵana bılik áreket etse, bul, árıne, jetkiliksiz. Búkil el bolyp jumylsaq, kózdegen maqsatymyzǵa jetemiz. Sol sebepti, men Joldaýymda Ulttyq quryltaı shaqyrý týraly bastama kóterdim.
Quryltaı shaqyrý erteden kele jatqan ata dástúrimiz ekenin jaqsy bilesizder. Babalarymyz mańyzdy máselelerdi osyndaı alqaly jıynda talqylaǵan. Halyq ózara aqyldasa otyryp, bir toqtamǵa kelgen. Mundaı sheshimder búkil eldi biriktirgen.
Tól tarıhymyzda ult taǵdyryn sheshken quryltaılar bolǵan. Onyń kóbi halqymyz úshin mańyzdy kezeńde ótkizilgen. Talas quryltaıynan keıin Altyn Orda derbes memleket boldy. Qaraqum jáne Ordabasy quryltaılary jurtymyzdy el qorǵaýǵa uıystyrdy. Orynbordaǵy birinshi qazaq quryltaıynda Alash partıasy quryldy. Ekinshi quryltaıda Alash avtonomıasy jarıalandy», - dedi memleket basshysy.