30 myńnan astam jasty jumysqa tartý jospary bar.
Qazaqstanda «Jasyl el» jalpyulttyq jobasynyń jańa eńbek maýsymy qaıta bastaldy. Joba jastardy eńbekke baýlýdy, tabıǵatty aıalaýǵa shaqyrýdy kózdeıdi, dep habarlaıdy Almaty-akshamy.kz Egemen.kz silteme jasap.
«Jasyl el» jastar eńbek jasaqtarynyń jańa maýsymynyń ashylý saltanatyna Aqparat jáne qoǵamdyq damý mınıstrliginiń ókilderi, qoǵam qaıratkerleri, respýblıkalyq jastar uıymdarynyń basshylary men «Jasyl el» óńirlik shtabtarynyń ókilderi qatysty.
«Jasyl el» jalpyulttyq jobasy 2005 jyldan beri júzege asyrylyp keledi. Bul jastar arasyndaǵy eń tanymal baǵdarlamalardyń biri desem, qate emes. Baǵdarlama aıasynda jas qazaqstandyqtar qalalardy kógaldandyrýǵa qatysyp, elimizdiń ekologıalyq jaǵdaıyn jaqsartýǵa óz úlesin qosyp jatyr. Sonymen qatar joba eńbekke baýlyp qana qoımaı, jastardy ortaq ıdeıalar tóńireginde toptastyrady», - dep atap ótti Azamattyq bastamalardy qoldaý ortalyǵy Basqarma tóraǵasynyń orynbasary Jasulan Bısembıev.
«Jasyl el» jastar eńbek jasaqtary – ekologıalyq jobalar men memlekettik baǵdarlamalardy iske asyrý arqyly jastardy maýsymdyq jumyspen qamtýǵa, qalalar men eldi mekenderdi kógaldandyrýǵa, abattandyrýǵa, jastardy patrıottyq turǵyda tárbıeleýge baǵyttalǵan jalpyulttyq qozǵalys.
«Eńbek maýsymynyń ashylýy – biz asyǵa kútetin eń mańyzdy oqıǵalardyń biri. Jyl boıy jastar tabys taýyp qana qoımaı, tájirıbe de jınaıdy, óz qabiletterin ushtaıdy, jańa múmkindikterdi ashady. Jasaqtardy irikteý kezinde biz halyqtyń áleýmettik osal toptarynan shyqqan balalarǵa ózderin kórsetýge, demalys kezeńinde aqsha tabýyna kóńil bólemiz. Bıyl biz 30 myńnan astam jasty jumysqa ornalastyrýdy josparlap otyrmyz», dedi «Jasyl el» respýblıkalyq shtabynyń jetekshisi Danıar Azamat.
Jobany Aqparat jáne qoǵamdyq damý mınıstrliginiń jáne Azamattyq bastamalardy qoldaý ortalyǵynyń qoldaýymen «Jasyl el» jastar eńbek jasaqtarynyń respýblıkalyq shtaby uıymdastyrdy.