Taı-breıkte qazaqstandyq tenısshi aıqyn basymdylyq tanytty
Qazaqstannyń ekinshi, álemniń 45-raketkasy Iýlıa Pýtınseva Ábý-Dabı WTA 500 týrnıriniń ekinshi aınalymyna shyqty, dep habarlaıdy Almaty-akshamy.kz QazAqparatqa silteme jasap.
Negizgi dodaǵa irikteý saıystarynan keıin qosylǵan Iý.Pýtınseva alǵashqy aınalymda álemniń 37-raketkasy, 2019 jylǵy US Open týrnıriniń chempıony, kanadalyq Bánka Andreeskýmen sheberlik baıqasty.
Birinshi partıada qarsylastar úsh-úshten breık almasty. Taı-breıkte qazaqstandyq tenısshi aıqyn basymdylyq tanytty – 7:6 (7:2).
Ekinshi setti Iýlıa breıkpen bastady – 2:0. Sodan keıin taǵy bir breık jasap, esepti 4:0-ge jetkizdi. Aqyry machqa dop bergende, óz múmkindigin jibergen joq – 6:2.
Bir saǵat 40 mınýtqa sozylǵan báseke barysynda qazaqstandyq sportshy 2 eıs jasap, 9 breık-poınttyń beseýin óz esebine jazdy. Qarsylasy 3 eıs, 3 breıkpen (7 breık-poınt) kózge tústi.
Iý.Pýtınseva shırek fınalǵa shyǵý úshin álemniń 14-raketkasy, brazılıalyq Beatrıs Haddad Maııamen talasady.
Qazaqstannyń birinshi, álemniń 10-raketkasy Elena Rybakınanyń da qarsylasy anyqtaldy. Jarysty ekinshi aınalymnan bastaıtyn E.Rybakına reıtıńte 20-oryndaǵy chehıalyq Karolına Plıshkovamen kezdesedi.