Qatty turmystyq qaldyqty bólek jınaý jáne suryptaýdy engizý jónindegi jol kartasy jasaldy.
İle-Alataý memlekettik ulttyq tabıǵı parkiniń aýmaǵynda ekologıalyq reıd ótti, dep habarlaıdy Almaty-akshamy.kz Ekologıa, geologıa jáne tabıǵı resýrstar mınıstrligine silteme jasap.
Sharaǵa park qyzmetkerlerimen birge Almaty qalasy týrızm basqarmasy men tabıǵatty qorǵaý polısıasynyń ókilderi, eriktiler, «Kaz Eco Patrol» RQB, ormanshylar, memlekettik ınspektorlar qatysty. Birlesken is-shara barysynda ekologıalyq zańnamany buzý faktileri anyqtaldy. Atap aıtqanda, orman faýnasyn joıý jáne zaqymdaý, sondaı-aq qaldyqpen lastaýǵa qatysty 1 fakt tirkeldi. Sondaı-aq órt qaýipsizdigi erejesi men ormannyń sanıtarıa erejesin saqtamaýǵa qatysty 3 fakti tirkeldi.
Aıta ketý kerek, İle-Alataý parkine jyl saıyn 250 myńnan astam týrıs keledi. Olardyń kóbeıýine baılanysty ulttyq park antropogendik faktorlardyń áserin azaıtý úshin týrıs marshrýttary men soqpaqtaryn únemi qadaǵalap otyrýy kerek.
«Qatty turmystyq qaldyqty bólek jınaý jáne suryptaýdy engizý jónindegi jol kartasy jasaldy. Ony júzege asyrý barysynda 2020 jyly 2 zamanaýı qoqys tasyǵysh, qatty turmystyq qaldyqty jınaýǵa arnalǵan 135 konteıner jáne organıkalyq jáne tamaq qaldyǵyna arnalǵan 90 konteıner satyp alyndy. Jyl basynan beri saıabaq aýmaǵynan 400 tonnadan astam qoqys shyǵaryldy. Sondaı-aq, órt qaýpi jaǵdaıyn ýshyqtyrmas úshin 4 tamyzdan bastap saıabaq aýmaǵynda ot jaǵýǵa tyıym salyndy. Ot jaqqan jáne qoqys tastaǵan adamdar ákimshilik jaýapkershilikke tartylady», delingen mınıstrliktiń habarlamasynda.