Qysqy demalystyń bastalýyna baılanysty polıseıler ata-analarǵa úndeý jasady, dep habarlaıdy Almaty-akshamy.kz Polisia.kz-ke silteme jasap.
Qurmetti ata-analar!
Qazirgi ýaqytta esirtki kez kelgen otbasynyń ómirine enýi múmkin. Bıyl polısıa esirtki taratýǵa qatysy bar 40-tan astam kámeletke tolmaǵan jasóspirimdi ustady.
Qysqy demalysqa baılanysty İshki ister mınıstrligi ata-analardy balalarynyń ómirine barynsha aralasýǵa shaqyrady, sebebi balanyń esirtki ımýnıtetin qalyptastyrýda otbasynyń róli eń mańyzdy.
Sizder balalaryńyzdyń ortasyn bilýlerińiz kerek, olar paıdalanatyn ınternet-resýrstardy qadaǵalaǵandaryńyz abzal. Jasóspirimniń zattarynyń arasynda kez kelgen dári-dármek qaptamalary, folga, shyny tútikteri, tamshýyrlar kezdesse, muqıat bolyńyz. Munyń bári sıntetıkalyq esirtkini qoldanýǵa arnalǵan qural bola alady.
Aqsha shyǵynyna nemese kerisinshe onyń kóbeıýine nazar aýdaryńyz. Sebebi esirtkini qoldanýdan basqa bala tez arada kóp tabys tabý múmkindigine qyzyǵyp, ony taratýǵa qatysýy múmkin, – dedi QR İİM esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov.
Eger sizdiń balańyzda:
- aralasatyn ortasy ózgerse;
- dostarymen sóılesý nemese hat almasý kezinde jańa túsiniksiz sózder paıda bolsa;
- telefonda, messendjerlerde geolokasıalary bar belgiler, fotosýretter paıda bolsa;
- telefon nómirleri, ınternet-saıtqa siltemeleri bar jazbalar nemese sandar jıyntyǵy bolsa;
belgisiz zattary bar túrli-tústi orama bolsa, siz kúdiktenýge tıissiz.
Esterińizge sala keteıik, esirtki qylmysy úshin qylmystyq jaýapkershilik 16 jastan, esirtkini satqany úshin 14 jastan bastalady.