Baǵdarlama 80 is-sharadan turady.
İs-sharalar shartty túrde tikeleı jáne janama dep bólingen, dep habarlaıdy Almaty-akshamy.kz
Tikeleı is-sharalar búdjet jumyskerleriniń jalaqysyn kóterýge jáne kiristerdegi teńgerimsizdikti teńestirýge, al janama is-sharalar halyqty jumyspen qamtýǵa járdemdesý, kásiptik daıarlaý (qaıta daıarlaý), óńdeýshi kásiporyndardyń ónimdiligin arttyrý jáne kásipkerlikti damytý arqyly tabystyń ósý múmkindikterin keńeıtýge baǵyttalǵan.
Bul týraly Úkimet otyrysynda QR Ulttyq ekonomıka mınıstri Álibek Qýantyrov aıtty.
«Osy jylǵy 11 qańtarda Memleket basshysy Májilis otyrysynda sóılegen sózinde halyqtyń jumyspen qamtylýy men tabysynyń tómendigi problemalaryna toqtalyp, Halyqtyń tabysyn arttyrý baǵdarlamasyn ázirleýdi tapsyrdy. Osy tapsyrmany oryndaý maqsatynda Ulttyq ekonomıka mınıstrligi memlekettik organdarmen, Ulttyq kásipkerler palatasymen jáne sarapshylyq qaýymdastyqpen birlesip, kedeıshilik pen jumyssyzdyq deńgeıi boıynsha naqty jaǵdaıǵa taldaý júrgizip, baǵdarlama jobasyn ázirledi. Taldaý nátıjeleri boıynsha turaqty oń dınamıkaǵa qaramastan, sońǵy eki jylda halyqtyń naqty aqshalaı tabysynyń ósý qarqyny 2019 jylǵy 6,4 paıyzdan 2021 jyly 2,9 paıyzǵa deıin baıaýlaǵany aıqyndaldy», - dedi mınıstr.
Sonymen qatar ol halyq tabysynyń qurylymynda eńbek etýden túsetin kiristerdiń tómendeýi jáne áleýmettik transfertterden kiristerdiń ósýi baıqalatyndyǵyn aıtady.
«Halyqtyń eńbek etýden túsetin tabysynyń úlesi sońǵy 10 jylda 10,8 paıyzdyq tarmaqqa tómendedi. Óz kezeginde, áleýmettik transfertterdiń úlesi kerisinshe, 10 paıyzdyq tarmaqqa ósti. Júrgizilgen taldaýdy eskere otyryp, Halyqtyń tabysyn arttyrý baǵdarlamasynda myna basymdyqtar belgilendi: jumysshy jastar; halyqtyń áleýmettik osal toptarynyń jekelegen sanattaryn jumysqa ornalastyrý; búdjet jumyskerlerine laıyqty jalaqy; eńbek kirisindegi teńgerimsizdikterdi joıý; aýyl sharýashylyǵynda, óńdeý ónerkásibinde tıimdi jumyspen qamtýdy damytýdy yntalandyrý; kásipkerlik kiristiń ósýin yntalandyrý; tabystyń satyp alý qabiletin qorǵaý», - dedi ol.
Mınıstrdiń atap ótýinshe, Úkimettiń búkil ekonomıkalyq saıasatynyń jalpy maqsaty halyq tabysyn arttyrý bolǵandyqtan, baǵdarlama ulttyq jobalarmen ózara baılanysty.
«Baǵdarlama 80 is-sharadan turady. Olar mynadaı negizgi baǵyttarǵa bólingen: halyqtyń eńbek tabysynyń artýy; keń aýqymdy jumyspen qamtýdy damytý arqyly halyqtyń tabysyn arttyrý; satyp alý qabiletin qorǵaý», - dedi Álibek Qýantyrov.