AQSH bastaǵan halyqaralyq koalısıa áskeri Sırıada arnaıy operasıa júrgizý nátıjesinde «Islam memleketi» (Qazaqstanda tyıym salynǵan – red.) lańkestik tobynyń joǵary shendi jetekshisin ustady, dep habarlaıdy Almaty-akshamy.kz QazAqparat-qa silteme jasap.
Koalısıa málimdemesi boıynsha «Aınymas sheshim» (CJTF-OIR) dep atalatyn halyqaralyq koalısıa kúshteri 16 maýsymǵa qaraǵan túni Sırıanyń soltústiginde IM-niń joǵary laýazymdy jetekshisin ustaý úshin lańkestikke qarsy operasıa júrgizdi.
«Tutqynǵa alynǵan adam – tájirıbeli bomba jasaýshy jáne IM-niń sırıalyq bólimshesindegi joǵary basshylardyń birine aınalǵan jedel deldal», - delingen habarlamada. Koalısıa operasıanyń sátti ótkenin, beıbit turǵyndardy qosa alǵanda eshkim zardap shekpegenin jarıalady. Sondaı-aq, koalısıa kúshterine, sonyń ishinde ushaqtar men basqa da múlikke zıan kelmegenin málimdedi. «Koalısıa kúshteri túpkilikti joıý úshin IM-niń qalǵan músheleri qaıda jasyrynsa da, izdeýdi jalǵastyrady», - dep málimdedi koalısıa basshylyǵy.