QR Ǵylym jáne joǵary bilim mınıstri Saıasat Nurbek Úkimet otyrysynda aldaǵy úsh jylda ǵylymdy damytýǵa 640 mlrd teńgeden astam qarajat bólinetinin aıtty
«Óńirlerde ǵylymı jobalardy komersıalandyrý deńgeıi tómen. Otandyq tehnologıalardy naqty sektorǵa engizýde qandaı kedergiler bar?», - dep surady Premer-Mınıstr Álıhan Smaıylov mınıstrden.
Saıasat Nurbektiń sózine qaraǵanda, munyń tarıhı sebepteri bar.
«Shyn máninde, qazirgi tańda óńirlerde komersıalandyrý deńgeıi tómen. Bul jerde tarıhı túsindirme bar. Bizde qazir negizgi joǵary oqý oryndary, negizgi ǵylymı zertteý ınstıtýttary Almatyda shoǵyrlanǵan. Stýdentterimizdiń 30 paıyzy, ǵalymdarymyzdyń 40 paıyzy sonda», - dedi mınıstr.
Vedomstvo basshysy ǵalymdar oılap tapqan tehnologıalardy naqty sektorǵa shyǵarý máselesin úsh baǵytta pysyqtaýǵa bolatynyn aıtty.
«Birinshisi – zańnamalyq baǵyt. Qazirgi tańda «Ǵylym jáne tehnologıalyq saıasat týraly» zań qabyldanyp jatyr. Endi jergilikti atqarýshy bılikke ǵylymdy komersıalandyrý, qarjylandyrý quzyreti beriledi. Ár óńirdiń jyldyq ǵylymı zertteý jospary qurylady. Iaǵnı, ákimderge biz osyndaı mindetteme berip otyrmyz», - dedi ol.
Ekinshi baǵyt – óńirlik joǵary oqý oryndarynyń áleýetin damytý.
«Coursera kýrstary, «sıfrlyq ýnıversıtet» baǵyttary, akademıalyq utqyrlyq jáne akademıalyq basymdyq óńirlik ýnıversıtetterge baǵyttalady. Úshinshi úlken baǵyt – qarjylandyrý. Kelesi 3 jylda ǵylymdy qarjylandyrý 3 ese ósedi. Bıyl 150 mlrd teńge, keler jyldary 240 mlrd teńge, ıaǵnı, úsh jyldyń ishinde biz 640 mlrd teńgeden astam ınvestısıa quıamyz. Onyń basym bóligi óńirlik ýnıversıtetterge, óńirlik ǵylymǵa baǵyttalady», - dedi Saıasat Nurbek.