Bıyl ál-Farabı atyndaǵy Qazaq Ulttyq ýnıversıteti tól gazetiniń baspadan shyǵyp, oqyrmanǵa jol tartqanyna 75 jyl toldy. Osynaý mereke oraı QazUÝ kitaphanasynda basylymnyń negizin qalaǵan, gazette eńbekteri jaryq kórgen jýrnalıser men ýnıversıtet oqytýshylary bas qosyp, merekelik is-shara ótkizdi. Jıynnyń shymyldyǵyn BAQ salasyndaǵy memlekettik saıasat departamentiniń dırektory Qaınar Ahetov quttyqtaý sózben ashty.
«Búginde ál-Farabı atyndaǵy Qazaq Ulttyq ýnıversıteti – Qazaqstannyń ǵylymy, saıası ómiri men ekonomıkasyna zor úles qosatyn, elimizdegi jetekshi oqý orny. Ýnıversıtet ǵylym men bilim berýdiń halyqaralyq keńistiginde laıyqty orynǵa ıe boldy. Osy ýnıversıtettegi «Qazaq Universiteti» basylymy stýdentterge, oqytýshylarǵa, ǵylymı qyzmetkerlerge ártúrli saladaǵy tyń aqparattar jarıalaýǵa múmkindik beredi. Sondaı-aq, kópjyldyq tarıhy bul gazet oqyrmandardy fakúltetterde ótkizilip jatqan is-sharalar men jańa oqýlyqtar, monografıalar, shyǵarmashylyq jetistiktermen tanystyrýda», – dedi Q.Ahetov.
Sharanyń ashylý saltanatynda QazUÝ basqarma múshesi, akademıalyq máseleler jónindegi prorektory Lázzat Erkinbaeva júrekjardy lebizin bildirip, gazettiń maqsat-mindetterin sóz etti.
«Qazaq Universiteti» gazeti – QazUÝ-dyń betke ustary. Bul gazette ýnısersıtettiń barlyq jetistikteri, myqty tulǵalar týraly estelikter jarıalanyp otyrady», – deıdi ál-Farabı atyndaǵy QazUÝ prorektory Lázzat Erkinbaeva.
«Qazaq Universiteti» gazetiniń alǵashqy sany 1948 jyly jaryq kórgen. Ǵasyrdyń tórtten úsh bóligin artta qaldyrǵan gazet alǵash ret «Za otlıchıe v ýchebe» dep atalyp, keıinnen QazUÝ-dyń tól ataýyn ıelengen. Basylymǵa «Qazaq Universiteti» degen ataý bergen Saǵymbaı Qozybaevtyń aıtýynsha, gazet tigindileri shyn mánisinde ýnıversıtet tarıhynyń shejiresine, stýdentterdiń, oqytýshylardyń baǵyndyrǵan belesteri týraly jarıa etetin ujymdyq baıanǵa aınaldy.
Elimizdiń tanymal jazýshylary, ǵalymdary men jýrnalıseri eńbek jolyn osy gazetten bastaǵan. Solardyń biri – «Qazaq gazetteri» JSHS Bas dırektordyń orynbasary, Almaty qalasy basylymdarynyń basshysy Dýman Anash.
«Stýdenttik kezeńde eń alǵash osy gazetten qalam terbep, merzimdi baspasózdegi alǵashqy qadamymyzdy osy kezetten bastaǵanbyz. Sol kezde Bekjan Áshirbaev aǵamyz bas redaktor bolatyn. Kún saıyn, sabaq arasynda redaksıaǵa kirip, gazetke qandaı maqalalar shyǵyp jatqanyn qarap júretinbiz. Sol jyldary Beıbit Sarybaıdyń alǵashqy áńgimeleri «Qazaq Universiteti» gazetinde jarıalanyp, stýdentter arasynda tanymaldyqqa ıe bolǵan. Barlyǵy oqyp, Beıbitti gazet arqyly tanyǵan bolatyn. Jalpy, bul gazet elge tanymal aqyn-jazýshylar, jýrnalıser, ǵalymdardyń tyrnaq aldy týyndylaryn alǵash jarıalaǵan basylym retinde barshamyzǵa ystyq », – deıdi D.Anash.
Shara barysynda gazetke bas redaktorlyq etken Dandaı Ysqaq, Saǵatbek Medeýbekuly estelikterimen bólisti. Odan bólek, jýrnalısıka tarıhynda eleýli orny bar Káken Qamzın, Moldahan Abdraev, Gúlmıra Sultanbaeva syndy profesor-oqytýshylar gazettiń mereıtoıymen quttyqtap, ǵumyry uzaq bolýyn tiledi.
Jıyn sońynda stýdentterdiń «Qazaq Universiteti» gazeti týraly daıyndaǵan beıne materıaldary, radıo baǵdarlamary men ǵylymı jobalary ekrannan kórsetilip, úzdikteri dıplommen marapattaldy. Onyń ishinde «Oılaıyq» zıankerlik oıynyn daıyndaǵan Baǵlan Turǵanbek, «Ǵasyrmen syrlas baspasóz» derekti fılmin ázirlegen Qosqanat Baýyrjan, «Gazette aýıdar kóp, qoǵamda baıqar kóp» jarnamalyq rolıgin pash etken Saıat Tólemistiń esimdi erekshe ataldy.
Sondaı-aq, gazettiń jaryqqa shyǵýyna súbeli úles qosqan ýnıversıtet oqytýshylaryna arnaıy statýetka tabystaldy.