Halyqtyń suraýymen, memlekettiń maquldaýymen bıyl «Álippe» qaıta oraldy.
Budan buryn elimizdiń Bilim jáne ǵylym mınıstri Asqat Aımaǵambetov «Álippeniń» Ahmet Baıtursynulynyń 1912 jyly shyqqan oqýlyǵynyń túpnegizinde jasalatynyn aıtqan bolatyn, dep habarlaıdy Almaty-akshamy.kz
Jańa oqýlyqta ult ustazynyń kitabynda ustanǵan dybystyq ádis ıdeıasy bar eken. Ondaǵy áripterdiń ornalasýy ońaıdan qıynǵa baǵyttalǵan. Endi balalar sóılem quraýdy ońaı ıgere alýy tıis. Jańa oqýlyqtaǵy áripterdiń reti ózgergen. Alǵashqy «A» árpinen keıin burynǵydaı «B» emes, «R» árpi turady. Sebebi Ahmet Baıtursynuly balaǵa áýeli «Ar» sózin úıretý mańyzdy degen.
Jańartylǵan álippede zamanaýı tehnologıa da eskerilgen. Oqýlyqtyń ár betinde QR-kod bar. Ony skanerlep, aýdıojazbalar tyńdaýǵa da múmkindik bar. Tipti tapsyrmalar da jalpylama berilmeı, oqýshyǵa qosymsha retinde arnaıy dıskte usynylady.
Jańarǵan oqýlyqtyń alǵashqy danasy mektep tabaldyryǵyn endi attaǵaly otyrǵan balalardyń qolyna erteń, ıaǵnı 25 tamyzda, tıedi.