Barlyǵy salyq tóleýden jaltarǵany úshin jaýapqa tartyldy
2020 jyly elimizdiń bes dúrkin chempıony "Ertis" fýtbol komandasy bereshekke belshesinen batyp, qarjylaı qıyndyqtarǵa tap bolýy saldarynan Premer-Lıga oıyndarynan shyǵarylǵan bolatyn, dep habarlaıdy Almaty-akshamy.kz inbusiness.kz-ke silteme jasap.
Osydan eki jyl buryn júrgizilgen aýdıt nátıjesi fýtbol klýbynyń 973,9 mln teńge salyqtan jaltarǵanyn anyqtady. Sondaı-aq, jattyqtyrýshylar men fýtbolshylar 379,5 mln teńge aılyqty artyq alǵan. Taǵy 8 mln teńge qaǵazda bar, is júzinde joq qyzmetkerlerge tólengen.
Sol jyldyń basynda klýbtyń damýyna búdjetten 1,8 mlrd teńge bólindi. Taǵy 1,6 mlrd teńgeni demeýshiler beredi degen jospar boldy. Biraq qarjylaı kómek kórsetetin kompanıa tek 200 mln teńge berýmen shekteldi.
Mundaı jaǵdaıdyń barlyǵy klýb jumysyn toqtatýǵa alyp keldi. Al zańsyz áreketterge barǵan basshylar sot aldynda jaýapqa tartyldy. Buǵan deıin búdjetke 193 mln teńge mindetti tólemdi ýaqytyly aýdarmaǵan klýbtyń burynǵy basshysy Serik Omarhanov bir jylǵa bas bostandyǵynan aıyrylǵan edi. Jaqynda klýbqa 2018-2019 jyldary jetekshilik etken Ardaq Torsyqpaev ta sottaldy. Qazynaǵa 300 mln teńge salyqty tólemegen burynǵy dırektor 2 jylyn temir tordyń arǵy jaǵynda ótkizetin boldy. Al kúni keshe 2016-2018 jyldary "Ertis" fýtbol klýbynyń basshysy qyzmetin atqarǵan Janaıdar Dúısembaevqa qatysty sot úkimi shyqty. Onyń tusynda shamamen 250 mln teńge qarjy qazynaǵa aýdarylmaǵan. J.Dúısembaevtyń kinási tolyǵymen dáleldenip, 1 jyl 6 aıǵa bas bostandyǵynan aıyrý jazasy qoldanyldy.