Jumys jospary talqylandy.
Almaty qalasy ákiminiń orynbasary Erjan Babaqumarov onlaın formatta kámeletke tolmaǵandarmen jumys boıynsha jedel áreket etý shtabynyń otyrysyn ótkizdi. Otyrysqa orta jáne kásiptik bilim berý uıymdarynyń basshylary, ÚEU ókilderi men bilim jáne psıhologıa salasynyń sarapshylary qatysty, dep habarlaıdy Almaty-akshamy.kz.
Shtab otyrysynyń negizgi mindeti – kámeletke tolmaǵandar arasyndaǵy devıantty minez-qulyqtyń aldyn alý ádisterin jetildirý. Bul qıyn ómirlik jaǵdaıdaǵy kámeletke tolmaǵandarǵa áleýmettik-psıhologıalyq qoldaý jasaý jáne qoldaý sharalaryn qamtamasyz etý úshin qajet.
Shtab músheleri qalada oryn alǵan daǵdarystyq jaǵdaılardy qarastyrdy jáne jalǵasyp jatqan pandemıany eskere otyryp, kámeletke tolmaǵandardyń emosıonaldy kóńil-kúıi men mazasyzdyq deńgeıin dıagnostıkalaý boıynsha kóp deńgeıli jumys josparyn talqylady. Otyrys barysynda Almaty qalasy ıývenaldy polısıa bóliminiń bastyǵy J. Shonjanova, bilim berýdegi jańa tehnologıalardyń ǵylymı-ádistemelik ortalyǵynyń psıhologıalyq qamtamasyz etý bóliminiń basshysy E. Alıeva, «Bilim Foundation» QQ aımaqtyq fılıalynyń basshysy V. Kokanova, sondaı-aq psıhıkalyq densaýlyq ortalyǵynyń ókilderi sóz sóıledi.
Sonymen qatar, bilim berýdiń dástúrli formatyna oralý aıasynda oqýshylardyń emosıonaldyq jaǵdaıyn taldaýdy kúsheıtý jáne «táýekel toptaryn» anyqtaý, sondaı-aq ata-analarmen ózara árekettestikti kúsheıtý boıynsha saraptamalyq pikirler tyńdaldy. Sondaı-aq oflaın rejımde oqýǵa qolaıly jaǵdaı jasaý úshin qaýipsizdik sharalaryn, onyń ishinde epıdemıologıalyq sharalardy saqtaýdyń mańyzdylyǵyna nazar aýdaryldy.
Ákimniń orynbasary Erjan Babaqumarov pandemıanyń kámeletke tolmaǵandardyń psıhologıalyq jaǵdaıyna keri áserin eskere otyryp, bilim berý mekemeleriniń psıhologıalyq qyzmeti jumysynyń biryńǵaı qalalyq algorıtmi men ádistemesin ázirleýdi tapsyrdy. Psıhologıalyq qyzmettiń tıimdiligin jáne medısınalyq kabınetterdiń jumysyn jaqsartý boıynsha qosymsha sharalardy ázirleý tapsyryldy. 2022 jyldan bastap mektepter men kolejderdegi krızısti oqıǵalardyń sany mektep ákimshiligi men aýdandyq bilim bóliminiń sapalyq kórsetkishine aınalady.
Eske salsaq, búginde Almaty qalasyndaǵy 207 mektepte 360 joǵary bilimdi psıholog jumys isteıdi. Mektep psıhologtary úshin biliktilikti arttyrý kýrstary uıymdastyrylady. 2020 jyly 153 psıholog kýrstardan ótti. Ómirlik qıyn jaǵdaıǵa nemese emosıonaldy aýytqýshylyqqa tap bolǵan adamdar úshin 376-56-60, 116-16 nómirleri boıynsha Almaty qalasynyń biryńǵaı baılanys ortalyǵymen biriktirilgen krızıs jaǵdaıyndaǵy senim telefony jumys isteıdi. Bul rette balalar men jasóspirimderge arnalǵan 150 nómiri boıynsha senim telefony jumys isteıdi.
