İİM múddeli memlekettik organdarmen birlesip, jańa týǵan balalarǵa JSN (jeke sáıkestendirý nómirin) berý boıynsha pılottyq jobany iske qosty.
Buryn balaǵa JSN ata-anasy týý týraly kýálik alýǵa ótinish bildirgennen keıin ǵana beriletin. Sol sebepti biraz bala ata-analary mundaı kýálikti alǵanǵa deıin esepke alynbaıtyn. Burynǵy júıege sáıkes AHAT organy aldymen balanyń tegin, atyn, ákesiniń atyn kórsetip, ata-anasynyń ótinishi negizinde týý týraly aktilik jazbany tirkeıtin. Sosyn ishki ister organdarymen balaǵa JSN jasalyp, keıin ata-anasyna týý týraly kýálik beriletin. Endi AHAT bólimi týý týraly medısınalyq kýálikti alǵannan keıin avtomatty túrde balanyń týý týraly aktilik jazbasyn jasaıdy, onyń negizinde balanyń JSN-y qalyptasady, dep habarlaıdy Almaty-akshamy.kz Polisia.kz-ke silteme jasap.
Bul arqyly balanyń ata-anasynyń jeke ótinishinsiz, proaktıvti formatta (kórsetiletin qyzmetti berýshiniń usynysy boıynsha) birqatar memlekettik qyzmetter avtomatty túrde kórsetiledi. Olar: bala týýǵa baılanysty jáne bala kútimi boıynsha járdemaqy alý; júktilikke jáne bosanýǵa baılanysty tabysynan aıyrylǵan jaǵdaıda áleýmettik tólemdi taǵaıyndaý jáne tóleý; bala 1,5 jasqa tolǵannan keıin onyń kútimine baılanysty tabysynan aıyrylǵan jaǵdaıda áleýmettik tólem. Sonymen qatar júıe anasyna balanyń tegi, aty jáne ákesiniń aty (bar bolsa) týraly málimetterdi berý týraly SMS-habarlama jiberedi (3 jumys kúni ishinde jaýap berý kerek).
Derekter alynǵannan keıin týý týraly kýálik ázirlenedi. Osylaısha týý týraly kýálik berilgenge deıin balaǵa JSN berý memlekettik organdardyń aqparattyq júıelerinde dúnıege kelgen balalardy tolyqqandy esepke alýǵa ǵana emes, sonymen qatar ata-analarǵa balanyń týýyna baılanysty memlekettik qyzmetter kórsetýge múmkindik beredi.