Alaıaqtardyń mekenjaıynan 60 azamattyń JSN, aty-jóni jazylǵan tizim tabylǵan.
Qyzylordalyq polıseıler elimizdiń úsh qalasynda ınternet-alaıaqtar tobyn qolǵa túsirdi, dep habarlaıdy Almaty-akshamy.kz Polisia.kz-ke silteme jasap.
Osy jyldyń sáýir aıynan bastap Qyzylorda oblysy Polısıa departamentiniń qyzmetkerleriniń talaıdy san soqtyrǵan ınternet alaıaqtardy quryqtaý boıynsha júrgizilgen arnaıy is-sharasy sátti aıaqtaldy. Jeńil jolmen aqsha tabýdy maqsat etken ákki alaıaqtar qolǵa tústi.
Esterińizde bolsa, óńirimizde ótken jyldyń qarasha aıynan bastap turǵyndarǵa belgisiz bireýler telefon arqyly habarlasyp, «jaqynyń esirtki zatymen ustalyp tur, ony jazadan bosatý úshin biz aıtqan esepshotqa dereý qarajat aýdarýyńyz kerek» dep úreılendirip, alaıaqtyq jolmen qarajattaryn jymqyryp kelgen qylmyskerler paıda bolǵan edi.
Osy kúnge deıin uqsas faktiler boıynsha oblys aýmaǵynda 32 qylmystyq is tirkelip, jábirlenýshilerge keltirilgen shyǵyn kólemi 24 mıllıon teńgege jýyqtady. Ákki alaıaqtardyń qylmystyq is-áreketterin áshkereleý maqsatynda polısıa departamentiniń bilikti qyzmetkerler qatarynan jedel tergeý toby qurylyp, tergeý amaldary bastaldy. Tergeý nátıjesi jınaqtalǵan aıǵaqtar arqyly alaıaqtyq tásilderdiń dálme-dál uqsastyǵyn jáne bul qylmystardyń barlyǵyn belgili bir qylmystyq toptyń jasaǵanyn kórsetti.
Jedel tergeý toby alaıaqtardyń is-áreketterin dáleldeıtin aıǵaqtardyń jetkilikti deńgeıde jınalǵandyǵyn nazarǵa ala otyryp, 15 shilde kúni bir mezette elimizdiń úsh oblysynda, ıaǵnı Almaty, Aqtóbe jáne Jambyl oblystarynda arnaıy is-shara ótkizdi. İs-shara barysynda ár oblysta bir-birimen sybaılasý arqyly alaıaqtyqpen aınalysyp kelgen 8 adamnan quralǵan qylmystyq top quryqtaldy.
Alaıaqtardyń mekenjaıyn tintý barysynda qylmys quraly retinde qoldanylǵan 17 uıaly telefon, beıtanys tulǵalardyń atyna jasyryn tirkelgen 15 abonenttik nómirler, 60 azamattyń JSN, aty-jóni jazylǵan tizim, aqsha aınalymdaryn tirkegen bloknot anyqtalyp, aıǵaq zat retinde tárkilendi.
Osylaısha jurtshylyqtyń mańdaı terimen tıyndap jınaǵan qarajatyn arbap alyp, bas paıdasyna jaratýǵa dánikken ákki ınternet-alaıaqtardyń joly kesildi. Qazirgi ýaqytta bul qylmystyq toptyń ózge de óńirlerde oryn alǵan alaıaqtyq qylmystaryna qatystylyǵy tekserilýde.