Ázirshe Qaraǵandy, Aqmola, Jambyl oblystaryndaǵy joldardyń boıynda salý josparlanǵan.
Qazaqstannyń respýblıkalyq, oblystyq mańyzy bar joldarynyń boıynda dámhana, dúkender, ájethana, jýyný bólmeleri, namazhanasy bar 35 zamanaýı jol boıy qyzmeti nysany salynbaq, dep habarlaıdy Almaty-akshamy.kz QR IIDM telegram kanalyna silteme jasap.
Jol boıy qyzmeti jobasynyń jetekshisi Dáýlet Seranovtyń málimetinshe, bul Comfort atty alǵashqy keshen Almaty-Qapshaǵaı tas jolynda qazirden bastap jumys istep tur.
«Bul jerde tek kóligine janarmaı quıyp qana qoımaı, tamaqtana alady. Kerek-jaraǵyn satyp alatyn shaǵyn market te bar. Uzaq saparǵa shyǵatyn júk kólikteri júrgizýshileriniń dýshqa túsýine bolady. Jaıly ájethanalardy aıtpaǵanda, dáret alatyn arnaıy oryn men namazhana da bar», — deıdi Dáýlet Seranov.
Mundaı keshenderdi Qazaqstannyń túkpir-túkpirine salý josparlanyp otyr. Uzyn-sany — 35. Úsh-tórt jyl ishinde osynshama keshen qurylysy aıaqtalýy tıis. Bolashaqta odan da kóp salynýy múmkin. Bastapqyda Qaraǵandy, Aqmola, Jambyl oblystaryndaǵy joldardyń boıynda jasalmaq.
«Bul keshenderge qajettilik kúsheıdi. Álemdik standarttarǵa saı zamanaýı keshender barlyq jerge salynýy tıis», - deıdi Dáýlet Seranov.