Bıyl óndiriste karton qoldanatyn kásipkerlerdiń jumysy birshama turalap qaldy.
Qazaqstanǵa shıkizat Reseı men Qytaıdan ımporttalatyndyqtan, baǵa rúbl men dollardyń baǵamyna baılanysty, dep habarlaıdy Almaty-akshamy.kz
Elimizde sút, túrli sýsyndar, kondıterlik ónimder, syılyqtar jáne taǵy basqa qatyrma qaǵazben qaptalatyn ónimder qymbattap jatyr.
Almatylyq kondıter Marıa Ryshkovanyń aıtýynsha, karton baǵasynyń ósýine baılanysty bıyl ónimderi 15 paıyzǵa qymbattaǵan.
«Qaptama qymbattap jatyr. Óıtkeni, otandyq óndiris joq. Ózimizde qaǵaz, karton, tipti plasık te óndirilmeıdi. Barlyǵy syrttan keledi. Qaptamalardyń baǵasy qymbattap jatqan soń, biz de óz ónimimizdiń qunyn ósirdik. Tortty qaptamasyz eshkimge bere almaısyń. Tutynýshylarǵa tátti búlinbeı jetý úshin syrtynda qorap bolady», - deıdi kondıterlik sehtyń dırektory Marıa Ryshkova.
Torttardy qaptaıtyn qoraptardyń árqaısysy osydan úsh aı buryn 35 teńge turatyn. Al, qazir munyń baǵasy eki ese kóterilip, 70 teńgege deıin bir-aq shyǵypty. Sáıkesinshe, kásipkerler táttiniń qunyn da sharyqtatýǵa májbúr.
Kartonnyń qymbattaǵanyna baspahanalar da shaǵymdanyp otyr. Jyl basynan beri materıaldardyń quny úshten birge ósken, al baǵa kún saıyn ózgerip jatyr.
Qazaqstanǵa shıkizat Reseı men Qytaıdan ımporttalatyndyqtan, baǵa rúbl men dollardyń baǵamyna baılanysty. Qazir karton men qaǵazdyń keıbir túrleri logıstıka, ıaǵnı taýar tasymaldaý qıyndap ketkendikten, tapshy bolyp otyr.