Bıyl baǵdarlamaǵa qatysýǵa 6 024 ótinim kelip tústi.
Qazaqstandyq ýnıversıtetterde tegin oqyǵysy keletin 2 149 adam álemniń 80 elinen konkýrsqa qatysqan, dep habarlaıdy Almaty-akshamy.kz
«Osymen tórtinshi jyl qatarynan elimizde sheteldik azamattarǵa, onyń ishinde Qazaqstan azamaty bolyp sanalmaıtyn ulty qazaq tulǵalarǵa arnalǵan stıpendıalyq baǵdarlamaǵa úmitkerlerdi irikteý júrgizilýde. Atalǵan baǵdarlamaǵa qatysýǵa nıet bildirýshiler sany jyl saıyn artyp keledi. Bıyl baǵdarlamaǵa qatysýǵa 6 024 ótinim kelip tústi. Úmitkerler baǵdarlama talaptaryna sáıkes qatań irikteýden ótti. Ótinim bildirýshiler joǵary akademıalyq úlgerim, talap etilgen qujattardyń bar bolýy jáne irikteýdiń barlyq kezeńderinen sátti ótýi negizinde irikteldi. Qazirgi kúnde úmitkerlerdiń nátıjelerin taldaý jumystary júrgizilýde», - dep Ǵylym jáne joǵary bilim mınıstri Saıasat Nurbek óziniń Facebook paraqshasynda jazdy.
Eske sala keteıik, bıyl stıpendıalyq baǵdarlamaǵa qatysýǵa ótinim berý 30 naýryz ben 30 maýsym aralyǵynda júrgizildi. 2023 jyly atalǵan baǵdarlama boıynsha 550 grant bólindi. Atap aıtqanda, bakalavrıat baǵdarlamalaryna 490 grant, magıstratýraǵa 50 jáne doktorantýraǵa 10 grant bólingen.
Sońǵy sheshim osy jyldyń tamyz aıynyń sońǵy on kúninde Ǵylym jáne joǵary bilim mınıstrligi janyndaǵy stıpendıattardy irikteý jónindegi Konkýrstyq komısıanyń sheshimimen qabyldanady.
Aıta keterligi, stıpendıalyq baǵdarlama iske qosylǵannan beri oǵan qatysýǵa 10 myńnan astam úmitker ótinim bergen. Baǵdarlama boıynsha 139 stıpendıat otandyq joǵary oqý ornyn támamdady. Búginde 538 stýdent atalǵan baǵdarlama sheńberinde bilim alyp jatyr.