Elimizde jastarǵa arnalǵan qandaı jeńildikter bar?

№1. Turǵyn úı baǵdarlamalary

Jastarǵa arnalǵan óńirlik ıpotekalar

Qazaqstanda 35 jasqa deıingi jastarǵa arnalǵan óńirlik turǵyn úı baǵdarlamalary jumys isteıdi. Ázirge mundaı baǵdarlamalar Almaty, Astana, Shymkent qalalarynda jáne Jambyl, Jetisý, Atyraý, Aqtóbe, Almaty, Atyraý, Qaraǵandy, Abaı, Ulytaý, Aqmola oblystarynda iske qosylsa, qalǵan óńirlerde de jyl sońyna deıin qolǵa alý josparlanǵan. 

Óńirlerdiń ereksheligine baılanysty turǵyn úı baǵdarlamalarynyń sharty árkelki. Degenmen, bárine ortaq paıyzdyq mólsherleme – 5%. 

Jastarǵa arnalǵan óńirlik ıpotekalardyń shartymen Informbúronyń arnaıy materıalynan oqýǵa bolady. 

Jumys isteıtin jastarǵa satyp alý quqyǵynsyz jalǵa berý

Buǵan tek Astana, Almaty, Shymkent qalasyndaǵy 29 jasqa deıingi jumys isteıtin jastar qatysa alady. Páterdi aı saıynǵy jaldaý aqysy – 5 myń teńgeden 15 myń teńgege deıin. Jaldaý merzimi – 5 jyl. 

Qatysýshylarǵa qoıylatyn talaptar:

• Astana, Almaty jáne Shymkent qalalarynda sońǵy 2 jyldan kem emes turaqty tirkelý;


• ótinish berýshiniń jáne onyń otbasy músheleriniń apatty turǵyn úıdi qospaǵanda, sońǵy 2 jyl ishinde jeke baspanasy bolmaýy;


• aıaqtalǵan orta, orta arnaýly, joǵary nemese joǵary oqý ornynan keıingi bilim;


• resmı jumys;


• ótinish berýshiniń sońǵy 6 aıdaǵy tabysy keminde 40 AEK (138 myń teńge) bolýy kerek.

Jyl saıyn baǵdarlamaǵa 1 myń jańa páter beriledi.

№2. Jeńildetilgen kredıtter

2,5 paıyzdyq shaǵyn nesıe

1 naýryzda 15 óńirde qujat qabyldaý bastaldy. Qazaqstannyń 20 aımaǵyna 5800 nesıe bólinedi jáne ol ár óńirdiń suranysyna qaraı anyqtalady. Keıbir aımaqta suranys kóp, keıbir aımaqta suranys az bolýy múmkin. 1 naýryzdan beri 15 óńirde qujattardy qabyldaý bastaldy. Ákimdikterdiń bastamasymen naýryz aıynyń aıaǵyna deıin tórt óńirde, sáýir aıynyń basynda eń sońǵy jıyrmasynshy óńirde baǵdarlama iske qosylady. 

Nesıeleý sharttary:

• Nesıe somasy – 5 mln teńgege deıin;


• Syıaqy mólsherlemesi – jyldyq 2,5%;


• Nesıe merzimi: mal sharýashylyǵyn damytýǵa – 7 jylǵa deıin;


• bıznestiń basqa baǵyttary úshin – 5 jylǵa deıin;

Negizgi borysh pen syıaqyny óteý kezinde shaǵyn nesıe merziminiń úshten birine deıin jeńildik kezeń qarastyrylǵan. Nesıe alý úshin kepilge múlik qoıý mindetti.

№3. Jumysqa turǵyzý baǵdarlamalary

Jastar praktıkasy

Baǵdarlama mamandyǵy boıynsha tehnıkalyq jáne kásiptik, orta bilimnen keıingi, joǵary, joǵary oqý ornynan keıingi bilim berý baǵdarlamalaryn iske asyratyn bilim berý uıymdarynyń, oqýdy aıaqtaǵan keıingi 3 jyl ishindegi jáne 35 jastan aspaǵan túlekteri qataryndaǵy jumyssyzdarǵa arnalǵan. Olar bir jyl boıy bekitilgen tizimdegi uıymda aqyly tájirıbeden ótedi. Ol úshin jastarǵa 100 myń teńgege jýyq aılyq beriledi.

Baǵdarlamaǵa qatysý úshin halyqty jumyspen qamtý ortalyqtaryna «Jastar praktıkasyn» uıymdastyrý jáne qarjylandyrý qaǵıdalaryna sáıkes nysan boıynsha ótinish berý qajet.

Tolyǵyraq myna jerde. 

Alǵashqy jumys orny

35 jastan aspaǵan jastar úshin birinshi jumys ornynda kásibı bilim men daǵdylardy berýg arnalǵan baǵdarlama. Birinshi jumys ornyndaǵy jumys uzaqtyǵy 18 aıdan aspaıdy, aıaqtalǵannan keıin qatysýshyǵa keminde 12 aı merzimge turaqty jumys orny beriledi. Jalaqy keminde 103 myń teńgeni (30 AEK) quraıdy. 

Joldama alý úshin turǵylyqty jeri boıynsha halyqty jumyspen qamtý ortalyǵyna júginý qajet.

Tolyǵyraq myna jerde.

Prezıdenttik jastar kadry rezervi

Jobada barynsha daıarlanǵan jáne tájirıbeli jastar úshin memlekettik basqarý jáne kvazımemlekettik sektor júıesinde basshylyq qyzmetke turýǵa biregeı múmkindik ashý maqsaty kózdelgen. Oǵan jasy 35-ten aspaǵan, joǵary bilimi bar, eńbek ótili 5 jyldan kem emes, memlekettik tildi V1 deńgeıinde biletin Qazaqstan Respýblıkasynyń azamattary qatysa alady. 

Tolyǵyraq myna jerde.

№4. Shákirtaqylar men bilim berý baǵdarlamalary

«Bolashaq» shákirtaqysy

Qazaqstandyq jastar «Bolashaq» halyqaralyq baǵdarlamasy arqyly shetelde magıstratýra, doktorantýra jáne rezıdentýrada oqı alady. Stıpendıa ıegerleri Aýstralıı, Belgıa, Ulybrıtanıa, Germanıa, Danıa, Izraıl, Irlandıa, Ispanıa, Italıa, Kanada, Qytaı, Gonkong, Nıderlandy, Jańa Zelandıa, Norvegıa, Reseı, Sıngapýr, AQSH, Fınlándıa, Fransıa, Chehıa, Shveısarıa, Shvesıa, Ońtústik Koreıa, Ońtústik Afrıka, Japonıada oqý múmkindigine ıe bolady.

«Qazaqstan halqyna» qorynyń shákirtaqysy

Oǵan bilim grantyn ala almaǵan aýyldyq jerlerdegi jaǵdaıy tómen otbasylardan shyqqan túlekter, jetim balalar jáne múgedektigi bar balalar qatysa alady. Sondaı-aq joǵary oqý oryndarynda aqyly bólimderde oqıtyn stýdentter Qordyń qarajaty esebinen oqýyn jalǵastyra alady. 

Qor jylyna 1 mıllıon teńgege deıingi oqý aqysyn óteıdi. Bul somadan asyp ketse qalǵan aqshany grant alýshy stýdenttiń ózi tóleýge tıis.

Qor bóletin granttar óteýsiz kómek bolǵandyqtan aqsha qaıtarylmaıdy jáne grant alýshy oqýyn aıaqtaǵannan keıin onyń oqýyna jumsalǵan qarajatty «óteýge» mindetti emes.

Taiburyl qoǵamdyq birlestiginiń shákirtaqysy

Qoǵamdyq birlestik stýdentterdiń, ǵalymdar men zertteýshilerdiń óz salalarynda damýyna kómektesedi. Tórt baǵdarlamasy bar: bilimdi, zerttýshilerdi jáne daryndylardy qoldaý, bıznes jáne memlekettik basqarý boıynsha qonaq dárister. Stýdentter baǵdarlamalarǵa onlaın ótinim bere alady. Ár jobanyń ótinim qabyldaıtyn óz ýaqyty bar. 

Shakhmardan Yessenov Foundation shákirtaqysy

Akademık Shahmardan Esenov atyndaǵy ǵylymı bilim berý qory jyl saıyn 20 stýdentke shákirtaqy taǵaıyndaıdy. Baǵdarlamaǵa qazaqstandyq ýnıversıtetterde jaratylystaný-ǵylymı, tehnıkalyq, medısınalyq jáne İT mamandyqtary boıynsha bakalavrıattyń 2-3 kýrs jáne  magıstratýra men ınternatýranyń 1-kýrs stýdentteri, 18 jasqa tolǵan Qazaqstan azamattary qatysa alady. 

«Órleý» baǵdarlamasy

Shahmardan Esenov qory joǵary (bakalavrıat) oqý aqysyn tóleý úshin memlekettik nemese ózge de grantqa ıe bola almaǵan, az qamtylǵan otbasylardan shyqqan 10 talapkerge grant bóledi. Baıqaýǵa «jaratylystaný ǵylymdary, matematıka jáne statısıka», «aqparattyq-kommýnıkasıalyq tehnologıalar», «ınjenerlik, óńdeý jáne qurylys salalary», «densaýlyq saqtaý» mamandyqtaryna oqýǵa túsýshiler qatysady. Ótinim onlaın qabyldanady.

Yessenov Launch Pad

Shahmardan Esenov qory IT-mamandarǵa hard jáne soft skills daǵdylaryn damytýǵa arnalǵan 10 grant bóledi. Grant ıegerleri 12 aıǵa deıin oqýdan ótedi. Ol úshin saıtta onlaın-ótinim toltyryp, jeke kýálik, motıvasıalyq hat pen CV usynýy kerek. Konkýrstyq irikteýden ótkenderge qor sarapshylarynyń arasynan tálimger taǵaıyndalady. Jeńimpazdar kýrstardy óz betinshe izdep, tálimgerlermen oqý baǵdarlamasyn kelisedi. Sodan soń oqýdan ótedi.  

Álem zerthanalaryndaǵy ǵylymı taǵylymdama

 Bul baıqaýǵa mamandyǵy jaratylystaný-ǵylymı nemese tehnıkalyq stýdentter jáne jumys istep jatqan ǵylymı qyzmetkerler qatysa alady. Baǵdarlama 10 adamǵa álemniń jetekshi ǵylymı jáne zertteý zerthanalarynda 90 kúndik jazǵy taǵylymdamadan ótýge múmkindik beredi. 

«Ǵylym qorynyń» qarjylandyrýy

Qor ǵylymı jáne ǵylymı-tehnıkalyq qyzmet nátıjelerin komersıalandyrýdyń neǵurlym perspektıvaly jobalaryn qarjylandyrady. Ǵylymı jobalar úshin materıaldy-tehnıkalyq kómek beredi. Granttar tehnologıa, ǵylymı ashylýlar, modelder, jańa materıaldar men zattar boıynsha jobalarǵa bólinedi. 

Sonymen birge qor jas ǵalymdardyń zertteýlerin granttyq qarjylandyrýǵa arnalǵan «Jas ǵalym» jobasyn júzege asyrady. Uzaq degende 32 aıǵa sozylatyn bir jobany qarjylandyrý 19 mıllıon teńgeden aspaıdy.

Baǵdarlamalar men shákirtaqylar týraly tolyǵyraq myna jerde. 

№5. Jastarǵa arnalǵan syılyqtar

Dala daýysy

Joba kompozıtorlardy qoldaý maqsatymen qolǵa alynǵan. Onyń qorytyndysy jeltoqsan aıynda shyǵarylady. Syılyqpen opera janrynda, halyq aspaptarynda tyń týyndylar jazyp júrgen sazgerler marapattalady. Sondaı-aq, onyń aıasynda «Respýblıka áni» atty estradalyq óner júldesi de beriledi. 

Umai syılyǵy

Qazaqstannyń shyǵarmashylyq ujymdary men jekelegen óner qaıratkerlerine eleýli shyǵarmashylyq tabystary men kásibı jetistikteri úshin «Teatr óneri», «Mýzykalyq oryndaýshylyq óner», «Horeografıalyq óner», «Teatrdaǵy beıneleý óneri» sıaqty 4 nomınasıa boıynsha tabys etiledi. Syılyqtyń jalpy júlde qory – 54 mln teńge. Bıyl «Balalar jylyna» oraı syılyq aıasynda "Úzdik balalar spektakli" degen arnaıy júlde taǵaıyndalǵan. 

«Aıboz» ulttyq ádebı syılyǵy

7 atalym boıynsha beriledi: «Úzdik proza», «Úzdik poezıa», «Úzdik drama», «Úzdik kórkem aýdarma», «Úzdik balalar ádebıeti», «Úzdik komıks» jáne «Kitaptyń úzdik dızaıny». Baıqaý júldegerlerine 5 mıllıon teńgeden qarjylaı syılyq tabystalady. Jeńimpaz avtorlardyń eń­bek­teri 500 danamen jaryq kóredi.

«Daryn» syılyǵy

Baıqaý ádebıet, ǵylym, dızaın jáne beıneleý óneri, jýrnalısıka, klasıkalyq mýzyka, qoǵamdyq qyzmet, sport, teatr jáne kıno,estrada, halyq shyǵarmashylyǵy atty 10 nomınasıa boıynsha ótedi.

Syılyqtar týraly tolyǵyraq myna jerde.