Qazaqstanda anımasıalyq fılmderdiń óndirisi qarqyn aldy.
Tek bıyldyń ózinde memleket bundaı 8 jobanyń túsirilimin qarjylandyrmaq. Olardyń qatarynda jas rejıser Dılshat Rahmatýllınniń týyndysy bar. Sońǵy 11 jyldyń ishinde ǵana onyń stýdıasynan ondaǵan múltfılm kórermenge jol tartty, dep habarlaıdy Almaty-akshamy.kz.
Ótken kóktemde «Besik jyry» atty eńbegi Túrkıadaǵy baıqaýda úzdik anımasıa dep tanyldy. Al, 2023 jyldyń sońynda «Ashına. Kóktegi qasqyrlar týraly ańyz» atty jańa jumystyń tusaýyn kesý kózdelgen.
«Bul 3-D formatynda túsirilgen múltfılm. Fılm orys tiline dýblájdalyp qazaq tilinde shyǵady. Sondaı-aq, qazir biz Túrkıa, jalpy, túrkitildes elder ony óz tilderine ózderi aýdaratyny jóninde kelissózder júrgizip jatyrmyz. Sapa jaǵynan kórshi memleketterdegi áriptesterden asyp túspesek, kem dúnıe jasamaımyz. Iaǵnı básekege qabiletti ónim. Sondyqtan, mańymyzdaǵy elderge prokatqa shyǵýymyz ábden múmkin», - deıdi anımasıalyq fılmderdiń rejıseri Dılshat Rahmatýllın.
Sondaı-aq, elordalyq medıakompanıanyń eki birdeı jobasy memlekettik demeýge ıe bolǵan. Ol ujym Ulttyq kınony qoldaýǵa baǵyttalǵan baıqaýǵa Almaty qalasyna arnalǵan kórkem fılm jáne «Eva. Batyr qyz» derekti týyndysyn usyndy. Sońǵysy názik jandylarǵa tán emes dástúrli ulttyq sport túri - kókpar oıynyna áýestenip, er minez tanytyp júrgen Almaty turǵynynyń ómir joly men jetistikterinen syr shertedi.
«Evanyń boıynda qorqynysh sezimi joq desek bolady. Eger siz kórgen bolsańyz, kúrt joǵary kóteriletin nemese tómen túsip ketetin dóńes jerler kóp. Ol ony at ústinde shaýyp júrip baǵyndyra alady. Bul er-azamattardyń ózinde ekiniń biriniń qolynan kele bermeıdi», - deıdi senarıst-rejısser Temirbek Amanjol.
Búginde jobanyń avtorlary «Eva. Batyr qyz» fılminiń bir bóligin túsirip úlgergen. 2022 jyly jabyq kórsetilim uıymdastyrý kózdelip otyr. Bul - shyǵarmashylyq toptyń alǵashqy úlken bastamasy. Jańa týyndyny túsirýge ketken shyǵynnyń 70%-yn memleket óteıdi. Aıta keteıik, bıyl búdjetten osy tekti 62 otandyq kınojoba qoldaý tabady.
«Jalpy, bıyl jarıalaǵan pıchıngke 200-den astam usynys kelip tústi. 60 paıyzdan astamy, ıaǵnı 70 paıyzǵa jýyǵy - jastardyń jobalary. Jalpy, Qazaqstan kınosynda jańa býynnyń qalyptasqanyn osydan-aq baıqaýǵa bolady. Jastar qazir batyl, táýelsiz, erkin oıly Jaqyn arada olar ózderiniń óndiristerin bastaıdy», - deıdi Ulttyq kınony qoldaý memlekettik ortalyǵynyń basqarma tóraǵasynyń orynbasary Abzal Muhımov.
Jaqynda otandyq kıno óndirisi jańa daryn ıelerimen tolyǵa túspek. Olardy el ǵana emes, shet memleketter de tanıtyn bolady. Bıyl 20-ǵa tarta elde qazaqstandyq kıno kúnderin ótkizý josparlanyp otyr. Bul tizimde AQSH, Kanada jáne Germanıa bar.