Sheteldik jumys kúshi qurylys salasyna kóp tartylypty.
1 qyrkúıektegi málimet boıynsha, jergilikti atqarýshy organdardyń ruqsatymen Qazaqstan aýmaǵynda 15 524 shetel azamaty eńbek etedi, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Sheteldik jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin – 594 ruqsat (birinshi sanat), qurylymdyq bólimshelerdiń basshylary úshin – 3 901 ruqsat (ekinshi sanat).
Eńbekke tartylǵan sheteldik jumys kúshiniń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe 8 894 jáne 911 adam.
Sondaı-aq maýsymdyq jumystarǵa 1 430 adam, al korporatıvtik aýystyrý aıasynda 1 604 adam tartyldy.
«Qazirgi ýaqytta Qazaqstanda sheteldik jumys kúshin paıdalanatyn 1 748 jumys berýshi bar. Olarda 400 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96%-yn quraıdy», - delingen habarlamada.
Ekonomıkalyq qyzmet túrleri boıynsha eń kóp jumys isteıtinder:
qurylys salasynda – 6 139 adam (40%);
taý-ken ónerkásibi jáne karerlerdi qazý – 1 489 adam (10%);
aýyl, orman jáne balyq sharýashylyǵy – 1 256 adam (8%);
kásibı, ǵylymı jáne tehnıkalyq qyzmet – 1 158 adam (8% );
óńdeý ónerkásibi – 1 154 adam (8%).
Vedomstvo aqparaty boıynsha, eńbek mıgranttary negizinen Qytaıdan – 3 576 adam, Úndistannan – 1 740 adam, Túrkıadan – 1 701 adam, Ózbekstannan – 1 535 adam, Ulybrıtanıadan – 1 127 adam kelgen.
İshki eńbek naryǵyn qorǵaý maqsatynda eńbek mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. Osy jylǵy qańtarda iri otandyq bıznes ókilderimen kezdesý qorytyndysy boıynsha Prezıdenttiń bergen tapsyrmasyn oryndaý úshin mınıstrlik shetel jumys kúshin tartýǵa arnalǵan kvotany buryn josparlanǵan 28 352 birlikten 23 560 birlikke deıin, ıaǵnı 4 792 adamǵa (16%) qysqartty.