Másele sheshimin tappasa, mektepterdegi oryn tapshylyǵy 1,2 mln-ǵa jetedi.
Bul týraly QR Oqý-aǵartý mınıstri Asqat Aımaǵambetov aıtty, dep habarlaıdy Almaty-akshamy.kz QazAqparatqa silteme jasap.
«Endi 2023 jyldan bastap salynatyn mektepter memlekettik standarttarǵa saı bolýy qajet. Eger robototehnıka, fızıka, hımıa pándik kabınetteri qajet bolsa, onda mektepti soǵan saı jabdyqtaý kerek. Qazirgi ýaqytta mektep salynyp bitedi de, lısenzıa alýǵa kelgende barlyq qajetti qural-jabdyqtyń jetispeıtini belgili bolatyny jasyryn emes. Máselen, sport zalyn alatyn bolsaq, qazirgi ýaqytta 1 200 oqýshyǵa arnalǵan óte úlken mektepter salynyp jatyr. Eki aýysymdy eseptesek, 2 400 oqýshy oqıdy. Biraq ol mektepte tek bir ǵana sport zaly qarastyrylǵan. Al eger tıptik oqý baǵdarlamasyn qaraıtyn bolsaq, aptasyna ár synypta úsh saǵat dene shynyqtyrý sabaǵy bar. Sol úsh saǵatty barlyq synypqa sanaıtyn bolsaq, onda bir sport zaly jetispeıdi jáne bir ýaqytta birneshe synyp bir sport zalynda shynyǵady. Sondyqtan birneshe sport zaly kerek. Nelikten qazir kóptegen ata-ana balalaryn memlekettik-jekeshelik áriptestik boıynsha salynǵan jańa mektepterge berýge umtylady? Sebebi olar tolyq jabdyqtalǵan jáne standarttarǵa saı. Sondyqtan bizge osyndaı mektepter qajet», - dedi Asqat Aımaǵambetov.
Mınıstr «Qolaıly mektep» jobasynda qurylys materıaldarynyń sapasy jáne bastaýysh pen joǵary synyp oqýshylaryn bloktarǵa bólý máselesi de qarastyrylatynyn aıtty.
«Bul joba boıynsha bizde qosymsha 800 myńnan astam oryn beriledi jáne joǵaryda aıtylǵan máseleler sheshimin tabady. Búgingi tańda elimiz boıynsha mektepterde 250 myńnan astam oryn tapshylyǵy bar. Eger biz osy máseleni qazir sheshpesek, 2026 jylǵa qaraı jalpy tapshylyq 1 mln 200 myńǵa deıin jetedi. Byltyr biz Prezıdenttiń tapsyrmasy aıasynda 277 mektep saldyq. Bıyl 225-ten asa mektep salǵaly otyrmyz. Mektep qurylysy men qarjylandyrýdy ákimdikter júrgizedi», - dedi mınıstr.