Elena Rybakına Indıan-Ýells masters týrnıriniń jartylaı fınalyna shyqty
Qazaqstannyń birinshi, álemniń 10-raketkasy Elena Rybakına AQSH-ta ótip jatqan Indıan-Ýells WTA 1000 týrnıriniń jartylaı fınalyna shyqty, dep habarlaıdy Almaty-akshamy.kz QazAqparatqa silteme jasap.
Qazaqstandyq tenısshi shırek fınalda álemniń 76-raketkasy, chehıalyq Karolına Mýhovamen oınady.
Qarsylastar osyǵan deıin 2019 jyly AQSH ashyq chempıonatynda kezdesip, onda chehıalyq sportshy 6:4, 6:4 esebimen basym túsken edi.
Bul joly birinshi partıada K.Mýhova breık jasap, 4:2 esebimen alǵa ketti. Biraq ol setke dop bergende, Elena tarazy basyn teńestirdi – 5:5. Sosyn taı-breıkte sátti óner kórsetti – 7:6 (7:4).
Ekinshi setti Mýhova breıkpen bastady – 2:0. Sodan keıin taǵy bir breıkpen bitirdi – 6:2.
Úshinshi, sheshýshi partıada E.Rybakına breıkpen alǵa ketti – 3:1. Esep 5:3 bolǵan mezette Elena eki machboldy paıdalana almady. Degenmen ózi dop bergende, esesin jibergen joq – 6:4.
Eki saǵat 46 mınýtqa sozylǵan tartysty mach barysynda qazaqstandyq sportshy 6 eıs jasap, 14 breık-poınttyń ekeýin óz esebine jazdy. Qarsylasy 1 eıs, 3 breıkpen (6 breık-poınt) kózge tústi.
Elena Rybakına fınalǵa shyǵý úshin álemniń 1-raketkasy, Polsha ókili Iga Shventek nemese reıtıńte 83-satydaǵy rýmynıalyq Sorana Kyrstányń bireýimen talasady.
Eske sala keteıik, budan buryn Elena Rybakınanyń Indıan-Ýells masters týrnıriniń shırek fınalyna ótkenin jazǵan bolatynbyz.