Qazaqstannyń birinshi, álemniń 23-raketkasy Elena Rybakına alǵash ret Ýımbldon týrnıriniń chempıony atandy, dep habarlaıdy Almaty-akshamy.kz Inform.kz-ke silteme jasap.
Qazaqstandyq tenısshi Ulybrıtanıa ashyq chempıonatynyń sońǵy básekesinde álemniń 2-raketkasy, týnıstik Ons Jabermen bas júldeni sarapqa saldy.
Bul ekeýiniń de «Úlken dýlyǵa» jarysyndaǵy alǵashqy fınaly edi. Osyǵan deıin qarsylastar úsh ret kezdesip, sonyń ekeýinde O.Jaber jeńiske jetken edi.
Birinshi partıada breık jasaǵan týnıstik sportshy alǵa ketti. Setti ol taǵy bir breıkpen támamdady – 6:3. Esesine ekinshi setti Elena breıkpen bastady – 2:0. Taǵy bir breık – 4:1. Sodan keıin óz geımin ala bildi – 6:2.
E.Rybakına úshinshi, sheshýshi partıany da breıkpen bastady – 2:0. Altynshy geımde Elena dop bergende, 0:40-tan «qutyla» aldy – 4:2.
Taǵy bir breık – 5:2. Sodan keıin machqa dop bergende, múmkindigin múlt jibergen joq – 6:2.
Osylaısha, Elena Rybakına qazaqstandyq tenısshiler arasynda tuńǵysh ret jekeleı synda «Úlken dýlyǵa» jarysynyń jeńimpazy atandy.
Eske sala keteıik, budan buryn býkmekerler Ýımbldon fınalynda Elena Rybakınanyń qarsylasyn favorıt dep tanyp otyrǵanyn jazǵan bolatynbyz.
Sondaı-aq qazaqstandyq tenısshilerdiń Bıllı Djın Kıng kýbogyndaǵy qarsylastary anyqtaldy.