Qazaqstandyq sportshy bıyl qatarynan 12-inshi jeńisine qol jetkizdi
Qazaqstannyń birinshi, álemniń 7-raketkasy Elena Rybakına sporttyq jolynda alǵash ret Maıamı WTA 1000 týrnıriniń jartylaı fınalyna shyqty, dep habarlaıdy Almaty-akshamy.kz QazAqparatqa silteme jasap.
Qazaqstandyq tenısshi shırek fınalda álemniń 24-raketkasy, ıtalıalyq Martına Trevızanmen sheberlik baıqasty.
Qarsylastar osyǵan deıin bir-birimen kezdespegen edi.
Álemniń 1-raketkasy, Polsha ókili Iga Shventek jaraqatyna baılanysty Maıamı masters týrnırine qatysýdan bas tartqannan keıin ıtalıalyq tenısshiniń jarys barysynda joly bolǵandaı edi. Biraq onyń tórtinshi aınalymda álemniń 22-raketkasy, 2017 jylǵy Rolan Garros týrnıriniń chempıony, latvıalyq Elena Ostapenkony jeńip ketýi M.Trevızannyń ońaı shaǵylatyn jańǵaq emestigin tanytty.
Birinshi partıada esep 1:1 bolǵan mezette E.Rybakına qarsylasynyń breık jasaýyna múmkindik bermeı, ózi sondaı sátti qur jibermedi – 3:1. Degenmen M.Trevızan da qarap qalmaı, breıkpen esepti qysqartqanymen, Elena sol boıda qarymta qaıyrdy – 5:3. Sodan keıin setke dop bergende, qatelesken joq – 6:3.
Qazaqstandyq tenısshi ekinshi setti breıkpen bastap, bet qaratpady – 6:0.
Bir saǵat 10 mınýtqa sozylǵan báseke barysynda E.Rybakına 10 eıs jasap, 9 breık-poınttyń beseýin óz paıdasyna jazdy. Qarsylasy 1 breıkpen (4 breık-poınt) ǵana kózge tústi.
Osylaısha, qazaqstandyq sportshy bıyl qatarynan 12-inshi jeńisine qol jetkizdi.
Elena Rybakına fınalǵa shyǵý úshin álemniń 3-raketkasy, amerıkalyq Djessıka Pegýla nemese reıtıńte 26-satydaǵy reseılik Anastasıa Potapovanyń bireýimen talasady.