Qazaqstanda korporatıvtik kesh ortasha eseppen qanshaǵa shyǵady?
Jańa jyldy ujym bolyp toılaý úlken qalalarda dástúrge aınalǵan. Qyzmettes áriptester jańa jyl merekesin kóterińki kóńil-kúı, toı-dýmanmen atap ótýge tyrysady. Alaıda, saltanatty keshtiń oıdaǵydaı ótýi úshin kompanıalar qomaqty soma bólýi kerek.
Kóptegen qalalarda jańajyldyq keshterdi negizinen ıvent-agenttikter uıymdastyrady, dep habarlaıdy Almaty-akshamy.kz QazAqparatqa silteme jasap.
Olardyń qyzmeti bir mıllıon teńgeden bastalady. Oǵan meıramhana nemese banket zalyn tańdaý, júrgizýshi, dıdjeı, qural-jabdyqtar men is-sharanyń jeke senarıi kiredi.
«Korporatıvtik keshterdiń baǵasy ár túrli parametrlerge baılanysty. Birinshiden, adamdar sanyna, ekinshiden, kúnine - bul jerde ol óte mańyzdy ról atqarady, óıtkeni mereke kúnderi júkteme men jaýapkershilik kóp bolady, sáıkesinshe, tólem azdap kóteriledi, úshinshiden, búdjetke baılanysty bolady. Mysaly, klıent bizge óz búdjetin beredi, biz soǵan sáıkes qyzmetterimizdi usynamyz. Munda baǵa ártúrli, 500 myńnan 5 mıllıon teńgege deıin jáne odan da joǵary. Merekeniń formaty da aýqymdy – bireý keshti keńsede uıymdastyrǵandy jón kórse, endi biri meıramhana tańdaıdy», – deıdi mereke uıymdastyrýshy Úmit.
Jańa jyl qarsańy – meıramhana men kafe ıeleri úshin de naǵyz qyzǵan shaq. Meıramhanalar daıyndyqty jeltoqsan aıynyń basynda-aq bastap ketti. Búginde olar jańajyldyq korporatıvterge tapsyrys qabyldap jatyr. Almaty meıramhanalarynda jańajyldyq korporatıvter orta eseppen adam basyna 11 myń teńgeden 40 myńǵa deıin barady.
Ońtústik astanadaǵy meıramhanalar jańa jylǵa daıyndyqty bastap ketti. Tipti, korporatıvti kesh ótkizýge daıyn ekenderin aıtyp, áleýmettik jelilerde talasa jarnamalap jatyr. Ádette, jańajyldyq korporatıvter 25 jeltoqsannan bastalady.
Qalanyń joǵarǵy jaǵynda ornalasqan meıramhanalarda jańajyldyq korporatıvtik mereke adam basyna 40 myńnan keledi. Ol baǵaǵa salattar, basytqylar, eki ystyq taǵam, ishimdikter, gazdalǵan jáne gazdalmaǵan sýsyndar, táttiler, jemister kiredi. Sonymen qatar, Aqshaqar men Aıaz Ata, asaba men mýzykanttar bar. Olar konkýrstar ótkizip, túrli syılyqtar oınalatyn lotereıalar oınatady.
Almatynyń ortalyǵynda ornalasqan meıramhanalarda jańajyldyq korporatıvter adam basyna 17- 20 myń teńge aralyǵynda. Dastarhan mázirinde 4 túrli basytqy, 3 túrli salat, 2 ystyq taǵam, shaı, nan men samsa, táttiler bar. Shoý-baǵdarlama da qarastyrǵan.
Dástúrli túrde arzandaý dep esepteletin qalanyń tómengi jaǵyndaǵy mekemelerge kelsek, onda otyrys adam basyna 11 myń teńgeden 15 myńǵa deıin barady. Mázirde 2 ystyq tamaq, 3-4 salat, tiske basar, nan, baýyrsaq bar. Spırttik ishimdik pen jemisterdi jáne tátti taǵamdardy ózimen alyp kelýge ruqsat etiledi. Odan basqa munda shoý-baǵdarlama men mýzykalyq kórkemdeý qarastyrylǵan.
Qazaqstannyń basqa aımaqtaryna keletin bolsaq, shaǵyn qalalarda ornalasqan meıramhanalardyń baǵasy áldeqaıda tómen, mysaly, Oral men Petropavlda adam basyna 10-15 myń teńge aralyǵynda, al Astanada kafe, meıramhana, karaoke baǵasy 15myńnan 27 myń teńgege deıin. Eldegi úshinshi megapolıs – Shymkent qalasynda adam basyna orta eseppen 18 myń teńgeden shyǵady. Barlyq jerde baǵaǵa shoý-baǵdarlama, júrgizýshiler, mýzykanttar jáne merekelik as máziri kiredi: alkogóldi sýsyndardy qospaǵanda, ystyq taǵamdar, salattar, jeńil taǵamdar, jemister bar.
Keıbir iri kompanıalar qyzmetkerleriniń kóńilin kóterý úshin mýzykanttar men artıserdi shaqyrady. Keshti júrgizýge shoý-bıznes salasynyń tanymal juldyzyn da shaqyrýy múmkin. Keshtiń shyraıyn kirgizip, sánin keltiretin artıser sybaǵasyna qyrýar aqsha suraıdy.
Osy saýalnamany júrgizgen tilshiler kóptegen juldyzdardyń konsert dırektorlaryna habarlasyp, olardyń baǵasyn bildi. Belgili bolǵandaı, kóptegen ánshiler jańajyldyq keshterge tapsyrys alyp qoıǵan eken. Otandyq juldyzdar bir keshte 7- 8 án aıtady. Onyń quny 1 mıllıon teńgeden bastalady.
Mysaly, Erke Esmahan elimizdiń basa qalalarynda ótetin saltanatty sharaǵa 3-4 mln teńge suraıdy. Eger Almaty qalasynda bolsa, onda soma birshama tómen. Iaǵnı, 2 mln teńgege 7-8 án aıtady.
Lýına 1,2 mıllıon teńgege keshińizdi keremet qyp ótkizip bermek.
Jastardyń súıikti ánshisi Nurbolat Qanaıdyń 40 mınýt án salǵany 2 mıllıon eken.
Dastan Orazbekov bir keshten 1,5 mln teńge alady.
Aıdana Medenova 1 mln teńgege qonaqtaryńyzdyń kóńilin kóterýge ázir.
Aıta keteıik, joǵaryda atalǵan ánshilerdiń basym bóligi aqshalarynyń 50 paıyzyn alyp ta qoıǵan.
Qazaqstanda jańajyldyq korporatıvtik keshterge reseılik juldyzdardy da shaqyratyn kompanıalar bar. Máselen, reseılik telearnalardyń biriniń málimetinshe, Fılıpp Kırkorovtyń Jańa jyl túnindegi óneri 300 myń dollar (140 mln teńge), al Dıma Bılan 37 mln teńgege án salyp berýge ázir. Niletto men Zivert te osy somaǵa kelisedi. Al Klava Koka óz ónerin 45 mln teńgege baǵalap otyr.