Kúndelikti belsendilikti kóbeıtýdiń eń ońaı joly - kóbirek jaıaý júrý. Olımpıadalyq chempıonnyń oılap tapqan ádisiniń nátıjesi oń bolyp shyqty. Djeffıng degen ne? Onyń densaýlyqqa paıdasy qandaı? Bul týraly "Doktor Pıter" basylymynda aıtyldy, - dep habarlaıdy Aqshamnews.kz tilshisi.
Djeffıng - júgirý men júrýdi almastyryp otyratyn jattyǵý tásili. Ony olımpıadaǵa qatysqan jelaıaq Djeff Gelloýeı usynǵan. Bul erekshe tásil júgirý qashyqtyǵyn birtindep arttyrýǵa, jaraqattan saqtanýǵa jáne jattyǵýdan lázzat alýǵa kómektesedi.
Ádistiń ereksheligi - júgirý men júrýdi kezekpen oryndaý. Eki mınýt júgirip, úsh mınýt jaıaý júrý, osylaı birneshe aınalym jasap, tolyqqandy jattyǵý quralady. Bul tásil tózimdilikti asyqpaı damytady. Jańadan bastaǵandar kóbine birden qatty qarqyn alyp, qatty sharshap, keıin múlde júgirgisi kelmeı qalady. Al júgirý men júristi úılestirý aǵzany júktemege jumsaq beıimdeıdi.
Jattyqtyrýshy Raılı Býgholstyń aıtýynsha, adam júgirgen saıyn býyndarǵa dene salmaǵynan úsh-tórt ese kóp kúsh túsedi. Ásirese jańa bastaǵanda aǵzaǵa mundaı áserge beıimdelýge ýaqyt kerek. Djeffıng jaraqat qaýpin azaıtyp, ókpeniń jumysyn kúsheıtýge, tózimdilikti arttyrýǵa jáne bulshyqetti nyǵaıtýǵa kómektesedi.
Taǵy bir psıhologıalyq paıdasy bar: júgirip júrgende qysqa demalys jasaǵyń keledi, biraq "toqtaǵan uıat" degen oı mazalaıdy. Djeffıng muny da sheshedi: siz aldyn ala belgili bir ýaqyt júgirip, sodan soń josparly úzilis jasaıtynyńyzdy bilesiz.