Almatyda Dımash Qudaıbergenniń STRANGER atty jeke konserti ótti, dep habarlaıdy Almaty-akshamy.kz Inform.kz-ke silteme jasap.
Bul - Dımashtyń Almatyda ótkizgen alǵashqy konserti.
«Bul konsertti osyndaǵy aǵaıynǵa, jerlesterime alǵash berip otyrmyn. Ol tipti men úshin emtıhan desem de bolady. Sonymen qatar sizderdiń kóńilderińizden shyǵyp, batalaryńyzdy alý úshin alǵash ret osynda kelip turmyn. Jalpy, men 15 jasymda dál osyndaı lyq toly stadıonda halyqpen birge án oryndasam dep armandaıtyn edim. Sol armanym sizderdiń arqalaryńyzda oryndalyp jatyr», - dedi ánshi konsert aldynda.
Konsertte Dımash Qudaıbergen burynnan aıtyp júrgen ánderimen qatar, jańa týyndylaryn da oryndady.
Sonymen qatar Dımash týǵan inisi Ábilmansur Qudaıbergenniń sózine jazylǵan ándi sahnaǵa alyp shyqty.
Konsertte halyqaralyq bıshiler ujymy, Qurmanǵazy atyndaǵy Qazaq memlekettik akademıalyq halyq aspaptar orkestri men «Saltanat» memlekettik bı ansambli ónerlerin ortaǵa saldy.
Shoýǵa jınalǵan halyq Dımashtyń tanymal ánderin birlese oryndady. Konsertte sondaı-aq, qobyz, dombyranyń tarıhynan syr shertetin beınerolıkter kórsetildi.
Shoý barysynda Dımashty óziniń bend-toby súıemeldedi.
Jalpy, konsert anshlagpen ótti.