Qazaqstanda koronavırýsqa qarsy ekpeniń úshinshi satysy bastaldy. Revaksınasıa qarqyndy júrip jatyr. Degenmen elimizdiń eki oblysy áli de «qyzyl» aımaqta. Al pandemıa jaǵdaıyndaǵy álemniń hali neshik?
Covid-19 taralýyna jol bermeý jónindegi VAK-tyń telegram kanalynyń málimetterine sáıkes, dúnıe júziniń epıdahýalyna sholý jasaıyq.
Amerıka Qurama Shtattary azamattardyń ómiri men densaýlyǵyna qaýip tóndiretin táýekeli joǵary elderdiń tizimin ázirleýde. AQSH-tyń Aýrýlardy baqylaý jáne aldyn-alý ortalyǵy (CDC) COVID-19 aýrýshańdyǵy órship turǵan Germanıa men Danıaǵa saparlardy shekteýdi usynady. Habarlamada qaýiptiń «tórtinshi deńgeıi» berilgen osy eki eýropalyq elge barýdan bas tartý, al ol múmkin bolmaǵan jaǵdaıda saparǵa shyǵý úshin aldymen tolyq vaksınasıadan ótý kerektigi týraly málimdelgen. CDC qalyptastyrǵan tizimge sońǵy aıda 100 myń adamǵa shaqqanda 500-den astam COVID-19 juqtyrý jaǵdaıy tirkelgen 75 el engen.
Norvegıa koronavırýs taralýynyń kezekti tolqynynyń aldynda tur jáne bul ahýal el bıligin alańdatyp otyr. Qarasha aıynan bastap elde SARS-CoV-2 jańa shtamyn juqtyrýdyń 34 848 jaǵdaıy anyqtaldy. Bul kórsetkish, ıaǵnı 30 000-nan astam KVI faktileri pandemıa bastalǵannan beri tek qarasha aıynda tirkelip otyr.
«Biz koronavırýs ınfeksıasymen kúresýimiz kerek. Iaǵnı betperde kıý, áleýmettik qashyqtyqty saqtaý jáne basqa da shekteýler, sondaı - aq alǵashqy belgiler baıqalǵan sátte, úıde emdelý syndy qaýipsizdik talaptary oryndalýy qajet»,-dedi Norvegıa Premer-mınıstri Ionas Gar Stóre.
Qazirgi ýaqytta Norvegıada koronavırýs ınfeksıasyna shaldyǵý derekteriniń jalpy sany 192 700-ge jýyqtady.
Ótken táýlikte Ońtústik Koreıada COVID-19 juqtyrýdyń 2 699 jaǵdaıy anyqtaldy. Elde rastalǵan derekterdiń jalpy sany 420 950-ge deıin jetti. Sonymen qatar kún saıyn Ońtústik Koreıada 100 myńnan astam adam COVID-19-ǵa qarsy ekpe saldyrýda. Bir kún buryn 136 809 azamat vırýsqa qarsy ekpe aldy. Onyń ishinde ekinshi dozany 87 611 adam qabyldady. Osylaısha, 23 qarashada 42 290 047 turǵyn alǵashqy dozamen ımmýnızasıalandy, 40 585 580 adam vaksınasıalaýdyń tolyq kýrsynan ótti. El bıligi halyqtyń 79% - y koronavırýs ınfeksıasyna qarsy tolyq egilgenin málimdedi.
22 qarashada Grýzıada pandemıa bastalǵannan beri 814 097 koronavırýs deregi tirkeldi. Bul kórsetkishpen álemde 47-shi orynda tur. Amerıkalyq tabloıdtar Grýzıany koronavırýs saldarynan kóz jumý derekteri boıynsha álem elderi arasynda birinshi orynǵa shyǵardy. «Nú-Iork taıms» gazetiniń jarıalaǵan statısıkalyq málimetterine sáıkes sońǵy aptada aýrýdan qaıtys bolý kórsetkishiniń kún saıynǵy deregi 74 adamdy qurap otyr. Bul 100 myń turǵynǵa shaqqanda 2 ólim-jitim jaǵdaıyn kórsetedi. Jalpy, elde 11 553 adam qaıtys boldy. Basylymnyń málimetinshe, ınfeksıa saldarynan kóz jumý deńgeıi boıynsha Grýzıadan keıingi orynda Bolgarıa, Moldova, Ýkraına, Horvatıa jáne Latvıa memleketteri tur.
Aldaǵy 20 kúnde jarıalanǵan Ulttyq lokdaýn aıasynda Avstrıa úkimeti vaksınasıaǵa kúmáni bar azamattardy ár-túrli jolmen COVID-19 ınfeksıasyna qarsy vaksına alýǵa qyzyqtyrý jumystaryn júrgizýde. Osylaısha, basty júlde - úı jáne elektromobıl bolyp tablatyn «koronavırýs» lotereıasynyń oınatylýy jarıalandy. Utys oıynyna 18 jastan asqan azamattar qatysa alady. Jalpy alǵanda, bul lotereıada myńǵa jýyq júlde oınatylady. Jeńimpazdar Rojdestvo qarsańynda jarıalanady.
Reseıdiń N.Gamaleıa atyndaǵy ǵylymı zeritteý ortalyǵynyń basshysy álemde koronavırýsqa qarsy júrgizilgen zertteýler týraly aıta otyryp, ǵalymdardyń áreketteri tek emdeý múmkindikterin baǵalaýǵa ǵana baılanysty ekenin habarlady. Sonymen qatar álemde koronavırýsty zertteýde erekshe jetistikter joq ekenin baıandady.
«Barlyq jetistikter emdeý múmkindigine baǵyttalǵan, óıtkeni vaksınalar bar, sáıkesinshe olardy jetildirý jumystary júrgiziledi. Biraq biz aldyn - alý jumystaryn emes, tek syrtqy áserge tótep berýdemiz», - dedi A.Gınsbýrg.
Ǵalym pandemıa tek ujymdyq ımýnıtetti qalyptastyrýmen aıaqtalady dep sanaıdy jáne oǵan jetýdiń jalǵyz joly – álemdegi jappaı vaksınasıa.