Áskerı-teńiz kúshteri Kaspıı teńiziniń qazaqstandyq sektorynda áskerı qaýipsizdikti, eldiń tutastyǵyn qamtamasyz etýge baǵyttalǵan.
Búgin Qazaqstannyń Áskerı-teńiz kúshteri óziniń 30 jyldyǵyn atap ótýde. Qazaqstan Respýblıkasynyń Qorǵanys mınıstri Rýslan Jaqsylyqov ardagerler men azamattyq qyzmetkerlerdi Táýelsiz Qazaqstannyń Áskerı-teńiz kúshteriniń qurylǵan kúnimen quttyqtady, dep habarlaıdy Almaty-akshamy.kz vedomstvonyń baspasóz qyzmetine silteme jasap.
Qorǵanys mınıstri Rýslan Jaqsylyqovtyń quttyqtaý mátini
Qurmetti áskerı teńizshiler!
«QR Qorǵanys mınıstrliginiń jáne Qarýly Kúshterdiń basshylyǵynyń, sondaı-aq óz atymnan sizderdi, barsha ardagerlerdi Áskerı-teńiz kúshteriniń 30 jyldyǵymen shyn júrekten quttyqtaımyn!
Táýelsizdik tiregine aınalǵan Qarýly kúshterdiń Áskerı-teńiz kúshteri Qazaqstannyń Kaspıı teńizi sektorynda egemendi elimizdiń tynyshtyǵy men qaýipsizdigin, táýelsizdigi men el tutastyǵyn saqtaý jolynda qaltqysyz qyzmet etip keledi.
Áskerı teńizshiler ózderine artylǵan senimdi abyroımen oryndap, oqý-jaýyngerlik mindetterdi atqarýda kásibı sheberlik tanytyp keledi. Qurylǵan ýaqyttan bastap otyz jyl ishinde qart Kaspııdiń atyrabynda uıymdastyrylǵan barlyq keshendi jattyǵýlarda Sizder bilikti maman ekenderińizdi baıqatyp, senimge selkeý túsirgen emessizder.
Mereıli kásibı meıramda barshańyzǵa myqty densaýlyq, qajymas qaırat, qyzmette qyraǵylyq, ómirde úlken belesterdi baǵyndyrýda sáttilik tileımin!»
Aıta ketelik, Qazaqstan Áskerı-teńiz kúshteri 1993 jyly 2 sáýirde Prezıdent Jarlyǵymen qurylǵan bolatyn. Áskerı-teńiz kúshteri Kaspıı teńiziniń qazaqstandyq sektorynda áskerı qaýipsizdikti, eldiń tutastyǵyn qamtamasyz etýge baǵyttalǵan. Búginde Áskerı-teńiz kúshteri zamanaýı kememen, qarýmen jáne tehnıkamen jaraqtandyrylǵan. Úzdik áskerı teńizshiler Eýropa men Amerıka elderinde bilim alady.
