1995 jyldan beri 30 tamyz elimizde Konstıtýsıa kúni retinde toılanyp keledi.
Ata zańymyzdyń 1-baby boıynsha Qazaqstan – demokratıalyq, zaıyrly, quqyqtyq jáne áleýmettik memleket. Memlekettiń eń qymbat baılyǵy – adam men onyń ómiri, quqyǵy men bostandyǵy, dep habarlaıdy Almaty-akshamy.kz.
Táýelsiz Qazaqstannyń tól Ata zańynyń tarıhy 1993 jyldan bastalady. Osy jyly elimizdiń alǵashqy Konstıtýsıasy qabyldandy. Qazir qoldanyp júrgen ekinshi Konstıtýsıa 1995 jyly qabyldandy. Qujattyń jobasyn ázirleýge Qazaqstannyń zań salasyndaǵy iri tulǵalary, ıntellektýal ǵalymdar, saıasatkerler atsalysty.
Táýelsizdiginiń 30 jylynda Qazaqstan túrli syn-qaterden ótip, damýdyń birneshe kezeńinen ótti. Osy ýaqytqa deıin Konstıtýsıa 1998, 2007, 2011, 2017 jáne 2019 jyldary reformaǵa túsken. 1998 jylǵy reforma aıasynda qujattyń 19 babyna ózgerister men tolyqtyrýlar engizildi. Prezıdenttiń, Senat pen Májilis depýtattarynyń merzimi men ókilettikterine qatysty naqtylaýlar bolyp, memlekettik qyzmetshilerge qoıylatyn joǵarǵy jas shegi alynyp tastalǵan bolatyn. Májilis depýtattaryn proporsıonaldy ókildik júıesi boıynsha partıalyq tizimder negizinde saılaý tájirıbesi de osy 1998 jylǵy túzetýlerden keıin qoldanysqa ene bastady.
2007 jylǵy reformalyq ózgeristerdiń qorytyndysy boıynsha, proporsıonaldy saılaý júıesiniń aıasy keńeıip, sonyń negizinde Úkimet jasaqtaý isine partıalyq fraksıalardy aralastyrýdyń tetigi engizildi. Qazaqstan halqy Assambleıasy konstıtýsıalyq mártebege ıe bolyp, óz ókilderin belgilengen kvota sanyna qaraı Parlament Májilisine, Senatyna jibere bastady.
2011 jylǵy ózgeriste Prezıdenttiń kezekten tys saılaýyn taǵaıyndaý men ótkizýdiń konstıtýsıalyq negizderi qaıta belgilendi. 2017 jyly Konstıtýsıanyń 25 babyna 33 túzetý engizildi. «Qazaqstan-2050» Strategıasy, Bes ınstıtýsıonaldyq reforma uǵymdary osy reformadan keıin saıası aınalymǵa shyqty.