«Bolashaq» shaǵyn aýdynynyń turǵyndary qazan aıynda sýmen jáne kárizben qamtamasyz etiledi
Almatyda aýdandyq ákimdikterdiń qyzmetteri keńeıgen soń Alataý aýdanynda uzyndyǵy 295 km ınjenerlik jelilerdi tóseý jumystary bastaldy, dep habarlady qala ákimi Erbolat Dosaev halyqpen kezdesýde.
«Alǵabas» jáne «Shapaǵat» shaǵyn aýdandarynda aýyz sý jáne káriz júıelerin salý jumystary maýsym aıynda bastaldy. Olar 2024 jyldyń qazan aıynda aıaqtalady. Al «Bolashaq» shaǵyn aýdanynda qazan aıynda abonentter sýmen jáne kárizben qamtamasyz etiledi.
«Sonymen qatar, «Saıaly» shaǵyn aýdanynda káriz júıelerin tóseý qarasha aıyna deıin aıaqtaý josparlanǵan. Tamyzda «Terekti», «Rahat-Mádenıet» shaǵyn aýdandarynda sýmen qamtý jáne káriz jelileriniń qurylysy bastalyp, 2024 jyldyń sońyna deıin aıaqtalady», - dedi qala ákimi.