Ortalyqtar kóp balaly otbasylarǵa barynsha qoldaý kórsetedi.
Qala turǵyndarynyń basym bóligi ortalyqtardyń arqasynda jumys tapty. Sonymen qatar 1500-den astam adam demeýshilerden materıaldyq qoldaý aldy. Bul týraly Almaty qalasy «Baqytty otbasy» ortalyǵynyń jetekshisi Zýlfıa Baısaqova aıtty, dep habarlaıdy Almaty-akshamy.kz QazAqparatqa silteme jasap.
«Bizdiń ortalyqtar kóp balaly otbasylarǵa barynsha qoldaý kórsetedi. Jumysqa ornalasýǵa kómektesemiz. Sonymen qatar, biz otbasylyq qundylyqtardy dáripteımiz. «Baqytty otbasy» ortalyqtarymen qatar dástúrli qolónerdi damytý ortalyǵy jumys isteıdi, onda myńdaǵan adam oqytý kýrstarynan ótti, myńnan astam áıel óz isin ashýǵa jáne damytýǵa: tigin sheberhanalaryn, aspazdyq, baspahanalardy, sulýlyq stýdıalaryn ashýǵa jáne damytýǵa óteýsiz granttar aldy», - dedi Zýlfıa Baısaqova.
Aıta ketsek, ortalyqtarǵa tek kóp balaly analar ǵana emes, sonymen qatar dombyra oınaýdy, akterlik sheberlikti, bıdi, qolónerdi úırenetin balalar da barady. Sondaı-aq balalarǵa orys jáne aǵylshyn tilderi, vokal, horeografıa boıynsha kýrstar qoljetimdi.
«Budan basqa, «Baqytty otbasy» ortalyqtary halyqtyń áleýmettik jaǵynan osal toptaryna kómek kórsetedi, olardy túrli baǵyttar boıynsha oqytady: aǵylshyn tili, kompúterlik saýattylyq, tigin isi, bıznes-josparlaý, kıim dızaıny, kásipkerlik, býhgalterıa, aspazdyq, kıiz basý, kirpikti uzartý, manıkúr, vızaj, shashtaraz qyzmetteri, pishý jáne tigý, SMM-marketıng, kıim dızaıny, uıaly telefondardy jóndeý, kondıter, aspaz jáne taǵy basqalary. Jyl basynan kýrsty 1611 adam aıaqtady. Bıyl 13 myanan astam almatylyq ortalyqqa júgindi»,- deıdi ol.
Eske salsaq, muqtaj otbasylardyń ómir súrý sapasyn arttyrýǵa baǵyttalǵan «Baqytty otbasy» ortalyǵy qalanyń ár aýdanynda 2019 jyldyń tamyz aıynan bastap jumys isteıdi. Qazir olardyń sany toǵyzǵa jetti.
Búginde Almatyda 32 278 kóp balaly otbasy turady, onyń ishinde 5001 adam «Altyn alqa» jáne «Kúmis alqa» alqalarymen marapattaldy.