Qazaqstannyń Eńbek sińirgen dárigeri dúnıeden ótti
Belgili ǵalym, Qazaqstan Respýblıkasyna Eńbek sińirgen oftalmolog dáriger, jazýshy Ǵabıden Mustafınniń qyzy, profesor Janar Ǵabıdenqyzy Mustafına ómirden ótti, dep habarlaıdy Almaty-akshamy.kz
Bul týraly Asfendıarov atyndaǵy Qazaq ulttyq medısına ýnıversıteti habarlady.
«Belgili ǵalym, Qazaqstannyń Eńbek sińirgen dárigeri, profesor Janar Ǵabıdenqyzy Mustafına 86 jasynda ómirden ozdy. Ol medısına men ǵylymǵa bar kúsh-jigerin arnady, ǵylymǵa, QazUMÝ-de oqý-tárbıe isin qalyptastyrýǵa zor úles qosty. Onyń eńbegi respýblıkada jáne odan tys jerlerde laıyqty bedel men qurmetke ıe boldy. Halyq jáne memleket aldyndaǵy qyzmeti «Parasat», «Qurmet belgisi» ordenderimen marapattalyp, «Qazaqstan Respýblıkasynyń Eńbek sińirgen dárigeri» ataǵy berilgen.
Asfendıarov atyndaǵy QazUMÝ oqytýshylary, stýdentteri men qyzmetkerleri marqumnyń týystarynyń qaıǵysyna ortaqtasyp, otbasy men jaqyndaryna kóńil aıtady. Janar Ǵabıdenqyzynyń jarqyn beınesi, onyń jigeri, meıirimdiligi, uqyptylyǵy, parasattylyǵy men jan dúnıesi ony tanyp, birge jumys isteý baqytyna ıe bolǵan jandardyń jadynda máńgi saqtalady», - delingen QazUMÝ habarlamasynda.