Elordada Beısen Quranbek atyndaǵy «Jiger» baıqaýynyń jeńimpazdary anyqtalyp, marapattaldy, dep habarlaıdy almaty-akshamy.kz inform.kz silteme jasap.
«Óz basym Beısen baýyrymyzdyń osy ómirde qaldyrǵan eńbegi eleýsiz qalmaı, osyndaı baıqaý arqyly jańǵyryp jatqanyna qýanyshtymyn. Baıqaýǵa qatysýshylardyń deni jastar boldy. Rasy kerek, jeńimpazdardy anyqtaý qıynǵa soqty. Barlyǵy 100 ótinish kelip tústi. Beısenniń baǵdarlama júrgizgende ózindik prınsıpteri boldy. Onyń sóıleý maqamy, ózin ustaýy, jýrnalısik etıkasy tutas bir dúnıe. Beısen negizinen áleýmettik baǵdarlamalardy júrgizgennen halyqqa jaqyn boldy, qaıyrymdylyqpen aınalysty. Baıqaý barysynda aımaqtaǵy tilshilerge mán berip, qoldaý kórsetýge tyrystyq», - dedi elimizge tanymal telejýrnalıst Arman Sqabyluly.
Beısen Quranbek atyndaǵy «Jiger» baıqaýynyń jeńimpazdary:
İ oryn - Jetisy telearnasynyń redaktory Sánıa Baıtarova.
İİ oryn - Aqtobe telearnasynyń redaktory Erlan Muqanov.
İİİ oryn - «Qazsport» telearnasynyń redaktory Indıra Bektenova.
«Beısen aǵamyzdyń beınesi esimizde máńgi qalary sózsiz. Taldyqorǵandaǵy aǵamyzdyń kabınetinde úlken portreti tur. Biz soǵan qarap, aǵamyz áli ortamyzda júrgendeı sezinemiz. Keıde qarap, kózimizge jas alamyz, bir qaraǵanda, aǵam maǵan jol kórsetip turǵandaı kórinedi. Beısen aǵamyz basqarǵan "Jetisý" telearnasynyń ujymy óte uıymshyl boldy. Jeńimpaz ataný - men úshin úlken qurmet. Uıymdastyrýshylarǵa alǵysymdy bildiremin. Jeńis jalǵyz meniki emes, ortaq dep esepteımin», - dedi baıqaý jeńimpazy Sánıa Baıtarova.
Atalǵan baıqaý jeńimpazdary dástúrli «Astana Media Week – 2021» medıa aptalyǵynyń ashylýy saltanatynda marapattaldy.
Aıta keteıik, búgin bastalǵan AMW-2021 barysynda halyqaralyq medıaqaýymdastyq músheleri aqparattyq kún tártibiniń ózekti máselelerin kóteredi. İs-sharaǵa álemdik BAQ-tyń top-menedjerleri, memlekettik apparat ókilderi, tanymal jýrnalıser, dokýmentalıster jáne AQSH, Ulybrıtanıa, Reseı, Qazaqstan, Ózbekstan, Qyrǵyzstan blogerleri qatysyp jatyr.