Oqý jylynyń basynda qalada 2120 oryndy 8 jeke menshik mektep ashý josparlanýda.
Almaty ákimi Baqytjan Saǵyntaev tamyz keńesinde jańa mektepterdiń qurylysy týraly aıtty, dep habarlaıdy Almaty-akshamy.kz.
«Karantındik shekteýlerge qaramastan, oqýshy oryndarynyń tapshylyǵyn azaıtý jáne qalalyq bilim berý mekemeleriniń jelisin odan ári keńeıtý maqsatynda ótken jyldan bastap, biz birden birneshe jobany iske asyra bastadyq», - dep atap ótti Baqytjan Saǵyntaev.
Máselen, qazirgi kezde qalada 12 600 oryndy 8 memlekettik mekteptiń, sondaı-aq qoldanystaǵy mektepter janynan salynyp jatqan 8263 oryndy 17 jańa korpýstyń qurylysy júrýde.
Bıylǵy oqý jylynyń basynda 4150 oryndyq 9 jańa korpýs paıdalanýǵa beriledi, 4113 oryndyq taǵy 8 jańa korpýs jyl sońyna deıin jumysyn bastaıdy. Sonymen qatar oqý jylynyń basynda qalada 2120 oryndyq 8 jeke menshik mektep ashý josparlanýda.
Taıaý arada 3500 oryndyq taǵy 4 memlekettik mektepti, 4400 oryndyq 11 jańa korpýstardy salý josparlanýda, sonymen qatar jeke ınvestorlarmen birge 4 mekteptiń jobalyq qýatyn ulǵaıta otyryp, renovasıalaý jáne 6 myń oryndyq 5 jeke uıym ashý josparlanýda.
Josparǵa sáıkes, seısmıkalyq nyǵaıtý jáne birneshe mektep ǵımarattaryn kúrdeli jóndeý jumystary da jalǵasýda. Sondyqtan oqý úderisine kedergi keltirmeý úshin oqýshylardy ýaqytsha kóshirý uıymdastyryldy.
Baqytjan Saǵyntaev qalalyq jaıly orta basqarmasy men bilim basqarmasyna birge aǵymdaǵy qurylys pen jóndeý jumystarynyń barysyna tıisti baqylaýdy jáne olardyń ýaqytyly jáne sapaly aıaqtalýyn qamtamasyz etýdi tapsyrdy.