Bitpesteı kóringen jazǵy demalys ta túgesilýge taıaý. Endi birer kúnnen soń bala bitken qaıtadan bilim ordalaryna oralady. Al demalys kezinde kim ne istedi, ýaqytty tıimdi paıdalana aldy ma, ol – basqa áńgime.
Bir anyǵy, ótken ǵasyrdaǵy urpaqtaı bireýleri jaz boıy dalada oıynnyń týyn tikken, endi biri ádebı shyǵarmalardan bas almaı, jata-jastana kitap oqyǵan bala kemde-kem. Esesine barlyǵynyń ańsary ǵalamtorǵa aýǵan. Jas jetkinshekterdiń ádebıetke qushtarlyǵy kún ótken saıyn azaıyp bara jatqandyǵy jasyryn emes. Erterektegi: «Balalar teledıdardan kóz almaıtyn boldy» degenimiz jaı nárse eken. Jas órkenniń sanasyn jaýlaǵan kók jáshikke endi áleýmettik jeliler men uıaly telefon qosyldy.
Balalardyń ıntellektýaldyq deńgeıi tómendep qana qoımaı, rýhanı jandúnıesi de jutańdaný ústinde. Eger baıqaǵan bolsańyz, bastaýysh synyp oqýshylarynyń deni belgili bir mátin boıynsha óz túsinigin aıtyp bere almaıdy. Al oqýyn oqıdy, tipti múdirmeı, jeldirtip oqyp shyǵady. Óıtkeni mektepte 1-synyptan bastap-aq balanyń «tehnıkalyq oqý jyldamdyǵy» tekseriledi jáne ár synypqa bekitilgen norma bar. Bylaısha aıtqanda, mektep balany kitapty oılanyp oqýǵa úıretpeıdi.
Osy oraıda, Ekzúperıdiń: «Tek júrek qana – shyn mánisinde kóregen. Eń negizgi nárseni kózben kóre almaısyń» degen bir sózi oıǵa oralady. Iaǵnı kitap oqýǵa úıretýdegi maqsat – balany kez kelgen shyǵarmaǵa júrekpen boılaýǵa baýlý bolsa kerek-ti.
Erterekte sheteldik bir jazýshy áıeldiń óziniń ádebıetke qalaı kelgendigi týraly esteligin oqyǵanym esimde. Soǵys kezi bolsa kerek. Álgi kisi – ol kezde kishkentaı qyz. Bir kúni úlken joldyń boıymen kitap tıelgen arbanyń ótip bara jatqandyǵyn kórip, arbakeshten kitaptardy qaıda apara jatqanyn suraıdy. Sóıtse, arbakesh olardy órtengen kitaphanadan alyp shyǵypty, «joıylyp ketpesin» dep, qaýipsizdeý bir jerge apara jatqan beti eken. Osy jaıttan erekshe áserlengen qyz bala, qıylyp surap, birneshe kitapty alyp qalady. İshinde Andersen ertegileriniń tolyq jınaǵy da bar bolyp shyǵady. Túrli-tústi muqabamen shyqqan 5 tomdyqta bir de bir sýret bolmaıdy. Biraq áldebir ǵajaıyp kúshke ıe sol kitaptardy túnimen jata-jastana oqýdy súıikti isine aınaldyrǵan balaýsa qyz, bara-bara óziniń qarańǵylyqtan, túnekten qorqatyn ádetin de umytyp ketedi. Oqyǵan árbir ertegisi ata-anasy oqqa ushqan qorǵansyz búldirshinge keler kún, atar tańǵa degen kishkentaı bolsa da úmit sáýlesin syılap, júregin jylytady, basyn jastyqqa qoıyp, bir mezet bolsa da alańsyz uıqyǵa ketýine járdemdesedi...
Mine, kitaptyń qudireti! Osy rette, balany kitap oqýǵa úıretýdegi basty maqsat – kórkem shyǵarmany jalań, jadaǵaı qabyldamaı, lázzat alyp oqýǵa mashyqtandyrý bolsa, qanekı! Shyn mánisinde, kitapty, jalpy, ádebıet álemin – túngi aspandaǵy juldyzdarǵa teńeýge bolady. Ol árkimniń kókirek kózin ashady, sanaǵa sáýle túsiredi, túnektiń ishinen jol tabýǵa jeteleıdi.
Sheteldik psıhologter óz keńesterine júginetin jasóspirimderden: «Ne úshin keldiń? Neni úırengiń keledi?» dep suraǵanda, kópshiligi: «Óz oıymdy erkin jetkize bilýge úırensem...» dep jaýap beredi eken. «Nege bulaı? Nege olar óz oıyn jetkizip aıta almaıdy?» degende mamandardyń aıtatyny: «Olardy bala kezinen «Durys jaýap – jaqsy, al qate jaýap – jaman» dep úıretken. Sonyń saldarynan balanyń oı-órisi buǵaýlanǵan, al ıntýısıasyna múlde «tyıym salynǵan»...
Demek balǵyn jastyń oı erkindigin damytyp, ishki túısigin arttyrýdyń birden-bir joly – ony kitappen dostastyrý bolsa kerek.