Elimizde balalarǵa arnalǵan tólqujatty qoldaný merzimin qysqartý jaǵy qaralyp jatyr, dep habarlaıdy Almaty-akshamy.kz QazAqparatqa silteme jasap.
«Balalarǵa arnalǵan tólqujat berýde halyqaralyq tájirıbeni eskere otyryp, onyń merzimin qysqartýdy usynamyz. Sebebi balalardyń syrtqy kelbeti tez ózgeredi. Iaǵnı balalar tólqujatyn 12 jasqa deıin emes, 5 jasqa deıin etip berip, sodan soń qaıta aýystyrsa. 12 jastan 16 jasqa deıin beriledi. Odan ári tólqujat pen jeke kýáliktiń jaramdylyǵy ádettegideı 10 jyl bolyp qala beredi. Sonymen qatar kámeletke tolmaǵan balalarǵa beriletin tólqujat úshin memlekettik baj salyǵyn 8 AEK-ten (23 336 teńge) 4 AEK-ke (11 668 teńge) deıin tómendetý usynylady», - dedi QR Parlamenti Májilisiniń depýtaty Erlan Smaılov Májilistiń zańnama jáne sot-quqyqtyq reforma komıtetiniń otyrysynda jasaǵan baıandamasynda.
Onyń aıtýynsha, qazaqstandyqtar jyl saıyn 600-700 myń tólqujat rásimdeıdi eken. Onyń 20%-y balalar tólqujaty.
«Sońǵy 5 jyl ishinde elimizde 3 035 956 eresek azamattarǵa arnalǵan tólqujat jáne 610 061 balalar tólqujaty daıyndalypty. Balalar tólqujatynyń merzimin qysqartýǵa qatysty joǵaryda aıtyp ótkenimdeı, olardyń syrtqy kelbeti tez ózgeredi. Iaǵnı bala tez ósedi de, 2-3 jyldan keıin tólqujattaǵy sýreti dál sol kezdegi túrine sáıkes kelmeı jatady. Sol sebepti keıde ata-analarǵa jańa tólqujat jasatýǵa týra keledi. Bul ata-ananyń qaltasyna júk túsiredi, ásirese, otbasynda 2-3 bala bolsa», - deıdi ol.