Tamyz aıy bastalǵannan ata-analar jańa oqý jylyna daıyndyqqa qyzý kirisip ketedi. Oqýshynyń mektep formasy, oqý quraldary, sporttyq kıimi, sómkesi, aıaq kıimi, qysqasy, bul naýqanda qaltany biraz qaǵýǵa týra keledi. Árıne, balasy úshin esh ata-ana aıanyp qalmasy anyq. Baryn salyp, balasyn eshkimnen kem qylmaýǵa áreket etedi. Degenmen, keıde qý tirshilik qos búıirden qysqanda sharasyz kúıge túsip, balasyn mektepke daıyndaı almaı qınalatyn jaǵdaılar da jıi kezdesedi.
Osyndaı keleńsizdiktiń aldyn alý maqsatynda elimizde biraz jyldan beri «Mektepke jol» aksıasy talaı balaǵa qýanysh syılap keledi.
Ótken oqý jylynda osy aksıanyń aıasynda mektebimizdegi 42 balanyń mektepke daıyndyǵyna 400 myń teńge kóleminde qoldaý kórsetilip, qajetti qural-jabdyqtar men kıimder úlestirilgen bolatyn. Bıyl da respýblıkalyq «Mektepke jol» aksıasyna barlyq deńgeıdegi mekeme basshylary, aýdan ákimderi, kásipker azamattar, memlekettik qyzmetkerler, úkimettik emes uıymdar, aýdan turǵyndary atsalysýda. Atalmysh sharaǵa mektebimizdiń ustazdarymen qatar, shaǵyn kásipkerler de belsene qatysty. Atap aıtqanda, mektep ujymynyń demeýshiligimen 10 oqýshyǵa mektep quraldary taratylsa, Almaty qalalyq máslıhatynyń depýtaty Dýlat Tastekeı 6 oqýshyǵa mektep formasy men oqý quraldaryn tartý etip, azamattyq tanytty. Sondaı-aq, Jetisý aýdanynyń ákimshiliginiń demeýshiliginiń arqasynda 20 oqýshyǵa «Glasman» tigin fabrıkasynyń 50 000 teńgelik sertıfıkaty jáne oqý quraldary salynǵan sómkeler syıǵa tartyldy. «Mektepke jol» aksıasy aıasynda “Novotel Almaty City Center” qonaqúıiniń ákimshiligi mektebimizdiń kópbalaly otbasylarynan shyqqan 10 oqýshyǵa (5-8 synyp) keńse taýarlary salynǵan rúgzaktar syıǵa tartyldy. Balalarymyzǵa qýanysh syılaǵan abzal jandarǵa mektep ujymy atynan zor alǵysymyzdy bildiremiz!
Osyndaı qoǵam aldyndaǵy jaýapkershilikti júregimen sezine biletin árbir adam qaıyrymdylyq sharasynan shet qalmaıtyny belgili.
Qoryta aıtqanda, biz qaıyrymdylyq is-áreketterimizben tek balalardyń ǵana emes, búkil qoǵamnyń bolashaǵyn jarqyn etýge atsalysamyz. Árbir bala ómirge meıirim men mahabbatqa toly kózqaraspen qaraýǵa laıyq.